ऊर्जा खबर
काठमाडौं । काभ्रेपलाञ्चोकको चौरीदेउराली गाउँपालिकामा राष्ट्रिय प्रसारण प्रणालीको विद्युत सेवा पुगेको छ । नेपाल विद्युत प्राधिकरण पाँचखाल वितरण केन्द्रले विद्युत विस्तार गरेपछि विद्युत सेवा पुगेको हो ।
गाउँपालिकाको वडा नम्बर ३ र ५ मा राष्ट्रिय प्रसारण प्रणालीको विद्युत पुगेको केन्द्र प्रमुख मेघनाथ ढकालले बताए । उनका अनुसार विद्युतीकरण विस्तारबाट यी गाउँपालिकाका करिब ११ सय घरधुरीले विद्युत सेवा पाएका छन् ।
‘पाँचखाल देखि करिब ८५ किलोमिटर ११ केभि लाइन निर्माण गरी विद्युत सेवा विस्तार गरिएको छ,’ उनले ऊर्जाखबरसँग भने, ‘अब वितरण केन्द्र पूर्ण विद्युतीकरण भएको छ ।’
राष्ट्रिय प्रसारण प्रणाली विस्तार भई गाउँमा उज्यालो पुगेपछि स्थानीय हर्सित बनेका छन् । गाउँमा विद्युत पुगेपछि बत्ती बाल्न, मोबाईल चार्ज गर्न, विद्युतीय उपकरण चलाउन र कुटानी पिसानी गर्ने मिल सञ्चालन गर्न सहज भएको स्थानीय बताउँछन् ।
चौरीदेउरालीमा विद्युत पुगेपछि काभ्रेपलाञ्चोक जिल्लामा पूर्ण विद्युतीकरण भएको पनि ढकालले जानकारी दिए । जिल्लामा ७ वटा गाउँपालिका र ६ वटा नगरपालिका छ । यी सबै स्थानीय निकायमा विद्युत पहुँच पुगिसकेको छ ।
केन्द्रले ग्राहकलाई मध्यनजर गर्दै मन्डनदेउपुर नगरपालिकामा नयाँ विद्युत महशुल काउन्टर सञ्चालन गरेको छ । काउन्टरबाट करिब साढे ६ सय ग्राहकका लाभान्वित भएका छन् । केन्द्र अन्तर्गत विद्युत सेवा लिने करिब २० हजार ग्राहक छन् ।
.jpg)
