ऊर्जा खबर
काठमाडौं । राष्ट्रिय प्रसारण प्रणालीको विद्युत प्रवाह हुने करिब तीन हजार सर्किट किलोमिटर प्रसारण लाइन निर्माणाधीन छन् । विद्युतीकरण र उपभोक्तालाई पर्याप्त, भरपर्दो, गुणस्तरीय तथा सुरक्षित विद्युत् आपूर्ति तथा वितरण हुने ४००, २२०, १३२, ६६ र ३३ केभी क्षमताका प्रसारण लाइन निर्माणाधीन छन् ।
विभिन्न क्षमताका २८५२ सर्किट किलोमिटर प्रसारण लाइन निर्माणाधीन रहेको नेपाल विद्युत प्राधिकरणले जनाएको छ । प्राधिकरणका अनुसार सबैभन्दा बढी १३२ केभीको ११११ सर्किट किलोमिटर प्रसारण लाइन निर्माणाधीन छन् ।
त्यस्तै, २२० र ४०० केभीको क्रमशः ९८८ र ७५४ सर्किट किलोमिटर प्रसारण लाइन निर्माणाधीन छन् । ६७५१ सर्किट किलोमिटर निर्माण अगाडि बढाउन प्रस्ताव गरिएको छ । १३२, २२० र ४०० केभीका क्रमश: ११४१, १७५२ र ३८५८ सर्किट किलोमिटर प्रसारण लाइन निर्माण प्रस्ताव गरिएको हो ।
विभिन्न क्षमताका १० हजार ४ सय ६९ एमभिए क्षमताका सबस्टेसनहरू निर्माणाधीन छन् भने १५ हजार ५ सय ६४ एमभिए क्षमताका सबस्टेसनहरू निर्माण प्रस्ताव गरिएको छ ।
नेपालको विद्युत प्रसारण प्रणालीमा बिगत ९ वर्षमा ३११८ किलोमिटर सर्किट प्रसारण लाइन थपिएको छ । लोडसेडिङको अन्त्यपछि विद्युतीकरण र उपभोक्तालाई पर्याप्त, भरपर्दो, गुणस्तरीय तथा सुरक्षित विद्युत् आपूर्तिलाई उच्च प्राथमिकतामा राखी काम गरिरहेको प्राधिकरणले प्रसारण र वितरणतर्फका पूर्वाधार संरचनाहरूको विस्तार र सुधारलाई व्यापक रुपमा अगाडि बढाएको छ ।
%20copy.jpg)
