ऊर्जा खबर
काठमाडौं । इन्भाइरोमेन्टल पार्टनर्स प्रा.लिले २३० मेगावाटकाे दुई जलविद्युत् आयोजनाको वातावरणीय प्रभाव मुल्यांकन (इआइए) प्रतिवेदनकाे काम डेढ वर्षमा सम्पन्न गर्ने भएकाे छ । रुकुममा पहिचान भएकाे ८० मेगावाटकाे पेल्मा खाेला र १५० मेगावाट सानीभेरी जलविद्युत् आयोजनाको इआइए प्रतिवेदन १६ महिनाभित्र तयार गर्ने भएकाे हाे ।
आयोजनाको इआइए प्रतिवेदनका लागि प्रवर्द्धक कम्पनीहरू पेल्मा हाइड्रो पावर प्रालि, पेल्पा हाइड्रो प्रोजेक्ट प्रालि र इन्भारोमेन्टल पार्टनर्सबीच सम्झौता भएको छ । सम्झौतापत्रमा दुवै प्रवर्द्धक कम्पनीका अध्यक्ष माेहनकुमार डांगी र इन्भाइरोमेन्टल पार्टनर्सका तर्फबाट प्रमुख कार्यकारी अधिकृत शंकर बस्यालले हस्ताक्षर गरे । सम्झौताअनुसार इआइए प्रतिवेदनकाे काम १६ महिनाभित्र सम्पन्न गर्नु पर्नेछ ।
पेल्मा हाइड्रो पावरले पेल्मा खोला र पेल्पा हाइड्रो प्रोजेक्ट १५० मेगावाटको सानीभेरी निर्माण गर्नेछ । यो दुवै आयोजना आंशिक जलाशय युक्त हो । आयोजनाको संभाव्यता अध्ययन भइरहेको छ ।
इन्भारोमेन्टल पार्टनर्सले हालसम्म ३० भन्दा बढी जलविद्युत् र प्रसारण लाइनको इआइए प्रतिवेदन तयार गरिसकेको छ ।
