ऊर्जा खबर
काठमाडौं । दोलखामा अघि बढाउन लागिएकाे ९९.५ मेगावाटको तामाकोसी-५ जलविद्युत आयोजना निर्माण गर्न चिनियाँ कम्पनी सिनो हाइड्रो कर्पोरेसन छनाेट भएको छ । आयोजनाको निर्माणका लागि प्राविधिक प्रस्तावमा छनाेट भएका दुई कम्पनीमध्ये आर्थिक प्रस्तावमा कम कबोल गर्ने सिनो हाइड्रो छनाेट भएको हो ।
नेपाल विद्युत प्राधिकरणले मंगलबार (फागुन १६ गते) खाेलेकाे वित्तीय प्रस्तावमा कम कबाेल गरेर निर्माण ठेक्का सिनो हाइड्रोले पाएकाे आयाेजना प्रमुख हेमन्त भट्टले बताए । अब सिनो हाइड्रोले पहिलो चरणको सिभिल र हाइड्रोमेकानिकलको काम गर्नेछ ।
प्रवर्द्धक कम्पनीले २०७९ साउन ९ गते आयोजना निर्माण गर्न इच्छुक विदेशी कम्पनीका लागि प्रस्ताव आह्वान गरेकोमा सिनो हाइड्रो कर्पोरेशन लिमिटेड र चाइना गेजुवा ग्रुप कर्पोरेशन प्राविधिक प्रस्तावबाट सर्टलिस्टमा छनोट भएका थिए ।
प्राधिकरणको सहायक कम्पनीमार्फत ४५६ मेगावाटको माथिल्लो तामाकोसी जलविद्युतकाे क्यासकेडको रूपमा यो आयोजना निर्माण हुनेछ । यसको बाँध निर्माण नगरी माथिल्लो तामाकोसीको विद्युत गृहबाट आएको टेलरेसको पानीलाई सिधै सुरुङमा पठाइनेछ ।
आयोजनाको ८ किलोमिटर सुरुङ निर्माण गरी सुरीटारमा भूमिगत विद्युतगृहमार्फत विद्युत उत्पादन गरिनेछ । आयोजनाबाट उत्पादित विद्युत २२० केभीको प्रसारण लाइनमार्फत २ किलामिटर दुरीमा रहेको गोंगर–खिम्ती प्रसारण लाइनमा जोड्नेछ ।
सिनो हाइड्रोले माथिल्लो तामाकोसी र कुलेखानी तेस्रोको निर्माणकाे काम गरेको थियाे । तनहुँ जलाशययुक्त आयोजनाको विद्युतगृहको समेत काम गर्दै आएको छ । पछिल्लो समय अलपत्र मेलम्ची खानेपानी आयोजनाको काम पनि यही कम्पनीले पूरा गरेको हो ।
आयोजनाको काम आगामी ४ वर्षभित्र सम्पन्न गर्ने आयोजना भट्टले बताए । आयोजनाको काम आर्थिक वर्ष २०८०/८१ देखि सुरु हुनेछ । आयोजनाका सम्पूर्ण संरचना विगू गाउँपाकिकामा निर्माण हुनेछ ।
करिब १८ अर्ब रुपैयाँ लागत अनुमान गरिएको आयोजनामा कर्मचारी सञ्चय कोषले ७० प्रतिशत अर्थात १३ अर्ब रुपैयाँ ऋण लगानी गर्ने सहमति जनाइसकेको छ । बाँकी स्वपूँजी तथा सर्वसाधारणबाट लगानी हुनेछ ।
यो आयोजनाको इन्जिनियरिङ प्रोक्युरमेन्ट कन्स्ट्रक्सन (इपीसी) मोडलमा निर्माण गर्न लागिएको छ । आयोजनालाई दुई भागमा निर्माण गर्न लागिएको छ । पहिलो भागमा सिभिल संरचना र हाइड्रो मेकानिकलको काम गर्न लागिएको हो । दोस्रोमा इलेक्ट्रो मेकानिकल काम हुनेछ ।
