हेटौंडा-भरतपुर-बर्दघाट प्रसारण लाइन आयोजना प्रमुख खड्गाको निधन

काठमाडौं । नेपाल विद्युत प्राधिकरणको निर्माणाधीन २२० केभी हेटौंडा–भरतपुर–बर्दघाट प्रसारण लाइनका आयोजना प्रमुख नरेशकुमार खड्गाको निधन भएको छ । उनको बुधबार बिहान साढे १० बजे हृदयघातबाट निधन भएको हो ।

गत कात्तिक २९ गते सिराहाको धनगढीमाई नगरपालिकाको जिरो माइल भन्ने स्थानमा दुर्घटनमा परी घाइते भई स्वास्थ्यलाभ गरिसकेपछि हृदयघातबाट निधन भएको आयोजनाका लेखा प्रमुख दिनेश रानाले बताए । ‘दुर्घटनामा घाइते भएर त उहाँ निको भइसक्नु भएको थियो,’ उनले ऊर्जा खबरसँग भने, ‘हृदय गति बन्द भएर निधन भएको भन्ने कुरा आएको छ ।’

सप्तरीको राजविराज घर भएको उनको बुधबार नै अन्त्यष्टी गरिएको छ । कात्तिक २९ मा चढेको गाडी पल्टिँदा उनी घाइते भएका थिए । घाइते अवस्थामा उनको विराटनगरस्थित नोबल अस्पतालमा उपचार गरिएको थियो ।

खड्गा ११ महिनाअघि मात्रै प्रमुख भएर हेटौंडा–भरतपुर–बर्दघाट प्रसारण लाइनका आयोजनामा गएका थिए । त्यसअघि उनी प्राधिकरणको केन्द्रीय कार्यालयमा थिए ।