ऊर्जा खबर
काठमाडौं । गण्डकी प्रदेशको लमजुङ जिल्लामा पहिचान भएको ४.१ मेगावाटको किसेदी खोला जलविद्युत् आयोजनाको काम सम्पन्न गर्न साढे ३ वर्ष लाग्ने भएको छ । मल्टिपर्पोज कम्पनी प्रालिले निर्माण गर्न लागेको आयोजनाको काम सन् २०२३ मार्चभित्र सम्पन्न गर्ने लक्ष्य राखिएको हो ।
जिल्लाको दोर्दी गाउँपालिका र दुधपोखरी गाउँपालिकामा अवस्थित किसेदी खोलामा आयोजना निर्माण हुनेछ । आयोजनाको मुख्य संरचनाहरू खोदाको बायाँ किनारामा रहने गरी डिजाइन तयार पारिएको छ ।
आयोजनामा ५५६४ मिटर लामो हेडरेस पाइप निर्माण हुनेछ भने ९४७ मिटर लामो पेनस्टक पाइप निर्माण हुनेछ । हेडरेस र पेनस्टक पाइप हुँदै पानीलाई विद्युतगृहमा पुर्याइनेछ ।
विद्युत्गृहमा २०५० किलोवाट क्षमताको दुई वटा टवाईन रहनेछ । २ वटा टवाईनमा जडान भएको जेनेरेटरमार्फत विद्युत उत्पादन गरिनेछ । आयोजनाबाट वार्षिक सरदर २४.३२२ गिगावाट घन्टा विद्युत् उत्पादन हुन्छ ।
उत्पादित विद्युत ३३ केभी प्रसारण लाइनमार्फत ५ किलोमिटर दुरीमा रहेको नेपाल विद्युत् प्राधिकरणको उदीपुर सबस्टेसनमा जोडिनेछ ।
