ऊर्जा खबर
काठमाडौं । पछिल्लो समय नेपालमा ग्रिन हाइड्रोजन उत्पादनका विषयमा बहस चलिरहँदा नजिकिदै गरेको प्रतिनिधिसभाको चुनावका लागि राजनीतिक दलहरूले हाइड्रोजन उत्पादन गर्ने प्रतिवद्धतासहित घोषणापत्र सार्वजनिक गरेका छन् । विश्वमा वैकल्पिक ऊर्जाको रुपमा विकास भइरहेको ग्रिन हाइड्रोजन नेपालमै उत्पादन गर्ने प्रतिवद्धतासहित घोषणापत्र सार्वजनिक गरेका हुन् ।
नेपालमा उत्पादन भएको विद्युत खपत बढाउन हाइड्रोजन उत्पादन गर्ने तथा वातावरणीय र आर्थिक हिसाबले प्रगति हासिल गर्न सकिने उल्लेख गर्दै राजनीतिक दलहरूले घोषणापत्र सार्वजनिक गरेका छन् । दलहरूले सार्वजनिक गरेको प्रतिवद्धतापत्रमा हाइड्रोजन उत्पादनदेखि प्लान्ट स्थापना गर्ने विषय समेटिएको छ ।
देश विकासका दीर्घकालीन र अल्पकालीन कार्ययोजना र लक्ष्यसहित सत्तासिन दल नेपाली काँग्रेस, नेपाल कम्युनिष्ट पार्टी (माओवादी केन्द्र), नेपाल कम्युनिष्ट पार्टी (एमाले) र राष्ट्रिय प्रजातन्त्र पाटी (राप्रपा) ले आ–आफ्ना प्रतिबद्धता घोषणा गरेका छन् ।
माओवादी केन्द्रले विश्वमा बढ्दो ऊर्जा संकटलाई मध्यनजर गर्दै आवश्यक नीति र संस्थागत संरचना विकास गरी आगामी ५ वर्षमा हाइड्रोजन प्लान्ट स्थापना गर्ने प्रतिवद्धता जनाएको छ ।
यस्तै, कांग्रेसले जलस्रोतको बहुआयामिक उपयोग गर्दै ग्रिन हाइड्रोजन तथा ग्रिन एमोनियाको उत्पादन तथा बिक्री गर्ने घोषणा गरेको छ । नेपालले आर्थिक उपार्जनका लागि हाइड्रोजन ऊर्जाको प्रयोग गर्ने घोषणापत्रमा उल्लेख छ ।
एमालेले पनि आफ्नो घोषणापत्रमार्फत हाइड्रोजन लगायत सबै प्रकारका ऊर्जाको समिश्रण र ऊर्जा बैंककाृे माध्यमबाट ऊर्जा सुरक्षाको प्रत्याभूति गरिने जनाएको छ ।
लामो समयदेखि ग्रीन हाइड्रोजनको क्षेत्रमा अध्ययन अनुसन्धान गर्दै आएको काठमाडौं विश्वविद्यालयको पहलमा ऊर्जा जलस्रोत तथा सिँचाइ मन्त्रालयले गरेको सम्भाव्यता अध्ययनले नेपालमा हाइड्रोजन उत्पादन गर्न सकिने जनाएकाे छ । अहिले आवश्यक नीति बनाउने तयारी भइरहेको छ ।
