ऊर्जा खबर
काठमाडौं । नेपाल विद्युत प्राधिकरण, मदेश प्रदेश प्रादेशिक कार्यालयका निर्देशक मुनिन्द्र ठाकुरले सप्तरीमा रहेको महदेवा फ्युज सेवा कार्यालयको उद्घाटन गरेका छन् । प्राधिकरण कन्चनपुर वितरण केन्द्र अन्तर्गत निर्माण भएको कार्यालयको आज (मंसिर २० गते) उद्घाटन गरेका हुन् ।
फ्युज सेवा सञ्चालनले महदेवा गाउँपालिकाका वडा नम्बर २ देखि ६ सम्मका महदेवा, अकवर्पुर, लाउँगी टोल, बाथनहा, पर्साही , भगवतपुर, दुर्गापुर मझौराका ग्राहकहरुमा सहज र गुणस्तर विद्युत् सेवा उपलब्ध हुनेछ ।
यसैगरी, तिरहुत गाउँपालिका केही स्थान र अग्निसाईर कृष्णश्वबन् गाउँपालिकाका बनौलीका करिब ७००० ग्राहकले भरपर्दो बिजुली पाउने विश्वास लिइएको केन्द्रले जनाएको छ ।
यस फ्युज सेवाले नियमित लाइन मर्मत सम्भार गर्ने, फ्युज गएमा फ्युज लगाउने लगायत नयाँ मिटरको लागि फारम भर्ने काम र ग्राहकलाई सजिलै बिल बुझाउने समेतको सुविधा हुने केन्द्रका प्रमुख अरुणकुमार साहले बताए ।
महादेवा गाउँपालिका द्वारा आयोजित उद्घाटन कार्यक्रममा उपस्थित हुनुमाननगर कंकालिनी नगरपालिकाका नगर प्रमुख वीरेन्द्र माझी लगायत तिरहुत र तिलठ्ठी कोइलाडी गाउँपालिका प्रमुखले छिटै आ –आफ्नो नगरपालिका÷गाउँपालिका चुहावट मुक्त गर्न पहल गर्ने समेत प्रतिबद्धता जनाए ।
