ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्रालयले राष्ट्रिय ऊर्जा नीति तर्जुमा र प्रसारण शुल्क (ह्विलिङ चार्ज) सम्बन्धी निर्देशिका तयार गर्ने भएको छ । शक्तिबहादुर बस्नेतले दोस्रो पटक मन्त्रालयको जिम्मेवारी सम्हाल्दै बुधबार (फागुन २३ गते) यी दुई नीतिगत काम गर्न निर्देशन सहितकाे निर्णय गरेका हुन् ।
राष्ट्रिय ऊर्जा नीति तर्जुमा गर्न मन्त्रालयका सचिव गोपालप्रसाद सिग्देलको संयोजकत्वमा समिति गठन गर्ने निर्णय भएको छ । समितिमा ऊर्जा महाशाखाका सहसचिव नविनराज सिंह, कानून तथा फैसला कार्यन्वयन महाशाखाका सहसचिव कलानिधि पौड्याल, नेपाल विद्युत् प्राधिकरणका कार्यकारी निर्देशक कुलमान घिसिङ सम्मिलित ४ सदस्यीय समिति गठन गर्ने निर्णय भएको छ ।
यसैगरी, राष्ट्रिय प्रसारण प्रणालीमा खुल्ला पहुँच र प्रसारण तथा विवरण दस्तुर (ह्विलिङ चार्ज) निर्धारण गर्ने व्यवस्थाको लागि ‘जेनेरल नेटवर्क एक्सेस गाइडलाइन’ तर्जुमा गर्ने निर्णय भएको छ । यसका लागि तीन महिनाभित्र गाइडलाइन तर्जुमा गरी पेश गर्न ‘जेनेरल नेटवर्क एक्सेस फ्रेमवर्क’ स्वीकृत भइसकेको छ । उक्त ‘जेनेरल नेटवर्क एक्सेस फ्रेमवर्क’ को अधिनमा रही विद्युत् नियमन आयोगले ‘जेनेरल नेटवर्क एक्सेस गाइडलाइन’ तर्जुमा गर्नेछ ।
