ऊर्जा खबर
काठमाडौं । अप्पर तामाकाेसी हाइड्राे पावर लिमिटेड गरेको २२०/१३२ केभी न्यू–खिम्ती सबस्टेसनको सबै काम पूरा भएको छ । सबस्टेसन पूरा भएसँगै ४५६ मेगावाटको माथिल्लो तामाकोसीको ९० मेगावाट बिजुली सोझै काठमाडौं ल्याउन सकिनेछ ।
तामाकोसीको बिजुली प्रवाह गर्ने दुई वटा माध्यम छन् । पहिलो, गोंगरबाट न्यू खिम्ती हुँदै ढल्केबर । दोस्रो, गोंगरबाट न्यू खिम्ती हुँदै लामोसाँघु–काठमाडौं । न्यू खिम्ती सबस्टेसनको सम्पूर्ण काम पूरा भएको हुँदा अब यहाँबाट आवश्यकता अनुसार तामाकोसीको बिजुली काठमाडौंतिर पनि बगाउन सकिनेछ ।
गत असार २१ गतेदेखि सञ्चालनमा आएको तामाकोसीको बिजुली यसअघि गोंगर हुँदै न्यू–खिम्तीबाट ढल्केबरसम्म मात्र प्रवाह हुँदै आएको थियो । अब काठमाडौंलाई खाँचो पर्दा तामाकोसीबाट उत्पादितमध्ये ९० मेगावाट सिधै काठमाडौं पठाउन सकिने अप्पर तामाकोसी हाइड्रो पावर कम्पनीका उप–प्रबन्धक पूर्णगोपाल रञ्जितले बताए ।
हाल तामाकोसीका ३ वटा युनिटबाट २२५ मेगावाट विद्युत् उत्पादन भइरहेको छ । १३२ केभी खिम्ती–लामोसाँघु–भक्तपुर लाइनमार्फत ३९ मेगावाट विद्युत उपत्यकामा पठाइएको छ । १८६ मेगावाट गोंगर–खिम्ती २२० केभी प्रसारण लाइन हुँदै ढल्केबरस्थित ४००/२२०/१३२ केभी सबस्टेसनमा पुर्याइएको छ ।
हालसम्म तामाकोसीका ४ वटा युनिट सञ्चालनमा आएका छन् तर अहिले ३ वटा युनिटमात्र सञ्चालन भइरहेका छन् । भदौभित्र ६ वटै युनिट सञ्चालन हुने रञ्जितले बताए । गत असार २१ गते (सोमबार) तामाकोसीको पहिलो युनिट, असार २९ गते दोस्रो युनिट, साउन ८ गते तेस्रो युनिट र साउन १८ गते चौथो युनिटबाट उत्पादन सुरु गरिएको थियो ।
आयोजनाले सबैभन्दा सुख्खा समयमा दैनिक कम्तीमा ४ घन्टा पूर्ण क्षमता (४५६ मेगावाट) उत्पादन गर्नेछ । रोल्वालिङ खोलाको पानी मिसाएर उत्पादन बढाउने योजना पनि कार्यान्वयन भइरहेको छ । आयोजनाबाट वार्षिक औसत २ अर्ब २८ करोड १० लाख युनिट उत्पादन हुनेछ ।
