ऊर्जा खबर
काठमाडौं । बुद्धभूमि नेपाल हाइड्रो पावर कम्पनी लिमिटेडको सेयर बाँडफाँड भएको छ । कम्पनीले नुवाकोटमा निर्माणाधीन ४.९९३ मेगावाटको तल्लो तादी खोला जलविद्युत आयोजनाको सर्वसाधारणका लागि गत असोज ११ गतेदेखि १४ गतेसम्म खुल्ला गरेको सेयर बाँडफाँड भएको हो ।
कम्पनीको सेयरधनी बन्न आवेदन दिएकामध्ये ७४ हजार ४ सय जनाले मात्र गोलाप्रथाबाट १० कित्ता सेयर प्राप्त गरेका छन् । बाँकी १९ लाख ४० हजार ५ सय २२ जनाको हात खाली भएको छ ।
कम्पनीको सेयर किन्न २० लाख ३० हजार ९५५ जनाको २ करोड ४४ लाख ३७० कित्ता सेयरका लागि आवेदन परेको बिक्री प्रबन्धक सिभिल क्यापिटल मार्केटले जनाएको छ । बित्री प्रबन्धकका अनुसार जसमध्ये १६ हजार ३३ जनाको आवेदन अस्वीकृत भएको छ । बाँकी २० लाख १४ हजार ९२२ जनामा गोलाप्रथाबाट सेयर बाँडफाँड गरिएको छ ।
कम्पनीले सर्वसाधारणको लागि ८ करोड रुपैयाँ बराबरको ८ लाख कित्ता साधारण सेयर निष्कासन गरेको थियो । कम्पनीका अनुसार सेयरमध्ये २ प्रतिशत अर्थात १६ हजार कित्ता सेयर कर्मचारीहरुका लागि र ५ प्रतिशत अर्थात ४० हजार कित्ता सेयर सामूहिक लगानी कोषका लागि छुट्याइएको थियाे। बाँकी ७ लाख ४४ हजार कित्ता सेयरका लागि सर्वसाधारणले आवेदन दिएका थिए ।
निर्माणाधीन आयोजनाको काम अन्तिम चरणमा पुगेको छ । आयोजनाबाट आगामी चैत्रभित्र विद्युत उत्पादन सुरु गर्ने लक्ष्य रहेको कम्पनीले जनाएको छ ।
