सागर केसी
दोलखा । दोलखाको गौरीशंकर गाउँपालिका–७ मार्बूमा निर्माणाधीन ३० मेगावाटको खानी खोला (दाेलखा) जलविद्युत् आयोजनाको बाँध क्षेत्रमा बाढीले क्षति पुर्याएको छ । निर्माणको अन्तिम चरणमा पुगेको आयोजनामा गएराती आएको आएको बाढीले क्षति पुर्याएको हो । आयोजनाको बाँध, इन्टेक, बालुवा थिग्रयाउने पोखरी लगायतका संरचना तयार भएका थिए । आउँदो असोजभित्र विद्युत् उत्पादन गर्ने गरी आयोजनाको काम अन्तिम चरणमा पुगेको बेला बाढीले बाँध क्षेत्रमा क्षति पुर्याएको खानी खोला जलविद्युत् आयोजनाको प्रर्द्धक कम्पनी साशा हाइड्रोपावर कम्पनीका सहायक प्रबन्धक छिरिङ शेर्पाले जानकारी दिए ।
‘अहिले बाँध र इन्टेकमा क्षति भएको छ भने बालुवा थिग्रयाउने पोखरीमा लेदो भरिएको देखिएको छ,’ उनले भने, ‘के कति क्षति भयो, अध्ययनपछि थाहा हुन्छ ।’ आयोजनाको विद्युत्गृहमुनि पनि केही क्षति पुर्याएको उनले बताए । बाढीले आयोजनाको बाँध क्षेत्रमा रहेको ठेकेदारको गोदाम घर र त्यहाँ रहेका ५ सय बोरा सिमेन्ट, डण्डी, क्रसरसमेत बगाएको छ ।
बाढीका कारण आयोजनाको विद्युत् उत्पादन ६ महिनासम्म पछि धकेलिन सक्ने उनले बताए । यही खोलामा बाढीका कारण २ वर्षअघि पनि निर्माणाधीन बाँधक्षेत्रमा क्षति पुर्याएको थियो ।
४० मेगावाटको खानी खोला–१ जलविद्युत् आयोजनाको बाँध क्षेत्र हनबू क्षेत्रमा ठूलो पहिरो आएर थुनिएको खोला एक्कासी फुट्दा बाढी आएको गौरीशंकर गाउँपालिका–७ का वडा अध्यक्ष सोनाम शेर्पाले बताए । बाढीले गुरुम्फीदेखि कोप्लाङसम्मको खोला किनारको सडक बगाएको उनले जानकारी दिए ।
