ऊर्जा खबर
काठमाडौं । नेपाल विद्युत प्राधिकरणले भिडभाड कम गर्न भन्दै शनिबार पनि सञ्चालन गर्दै आएको विद्युत महसुल काउन्टर आगामी कात्तिक १ गतेदेखि बन्द गर्ने भएको छ । प्राधिकरणले विद्युत सेवा प्रयोग गरे बापत् अनलाइन पेमेन्ट गर्न सकिने भन्दै काउन्टर बन्द गर्न लागेको हो ।
प्राधिकरण वितरण तथा ग्राहक सेवा निर्देशनालय, दरबारमार्गले सूचना जारी गर्दै असोज ११ को निर्णय अनुसार शनिबार सञ्चालन हुँदै आएको महसुल काउन्टर कात्तिकदेखि बन्द गर्ने जनाएको छ ।
विभिन्न सेवा प्रदायक कम्पनीहरू मार्फत पनि हरेक दिन बिहान १० बजेदेखि राती १२ बजेसम्म अनलाइन पेमेन्टको माध्यमबाट भुक्तानी गर्न सकिनेछ । अनलाइन पेमेन्टको सुविधा नभएको अवस्थामा प्राधिकरणका केही वितरण केन्द्रहरू अतिरिक्त सहुलियताका रुपमा शनिबार पनि सञ्चालन गर्दै आएको थियो ।
हाल प्राधिकरणले विद्युत उपभोक्ताहरूको महसुल बुझाउने क्रममा हुने भीडलाई ध्यानमा राख्दै अनलाइन पेमेन्टको व्यवस्था गरेको छ । अब, शनिबार काउन्टर खोलिराख्न आवश्यक नदेखिएकोले बन्द गर्ने निर्णय गरिएको सूचनामा उल्लेख छ ।
