ऊर्जा खबर
काठमाडौँ । डडेल्धुराको परशुराम नागरपालिका २.५ मेगावाटको शीर्षागाड खोला साना जलविद्युत् आयोजना निर्माण गरिने भएको छ । उक्त नगरपालिकाको वडा नम्बर ३ र ४ मा आयोजनाको संरचना रहने गरी दुर्गाथली पावर कम्पनी प्रालिले आयोजना विकास गर्ने भएको हो । यसका लागि उत्पादन अनुमति पत्रको माग गर्दै कम्पनीले विद्युत् विकास विभागमा आवेदन दिई प्रक्रिया अघि बढाएको छ ।
आयोजना अन्तर्गत स्थानीय शीर्षागाड खोलाको पानी फर्काउन ३ मिटर उचाइको २८ मिटर लामो बाँध निर्माण गरिने छ । विद्युत्गृहमा २ वटा उत्पादन युनिट रहने गरी डिजाइन गरिएको छ ।
आयोजनाबाट वार्षिक सरदर १३.६६ गिगावाट घण्टा विद्युत् उत्पादन गर्ने लक्ष्य छ । आयोजनाबाट उत्पादन हुने विद्युत्लाई ३३ केभी क्षमताको २.५ किलोमिटर लामो डबल सर्किट प्रसारण लाइनमार्फत परशुराम नगरपालिका–१२ मा प्रस्तावित जोगबुढा सबस्टेसनमा जोडिने छ ।
आयोजनाबाट सन् २०२८ को जुन ७ भित्र विद्युत् उत्पादन गर्ने लक्ष्य राखिएको छ ।
