ऊर्जा खबर
काठमाडौं । नेपाल विद्युत प्राधिकरण बागलुङ वितरण केन्द्रले जिल्लाको गल्कोट नगरपालिकामा राष्ट्रिय प्रसारण प्रणालीको विद्युत सेवा पुर्याएको छ । केन्द्रले करिब डेढ किलोमिटर लामो ११ केभी लाइन निर्माण गरी सेवा विस्तार गरेको हो ।
नगरपालिकाको वडा नम्बर–१ दुधिलाभाटिको ज्यामिरेदेखि आलेडाडासम्म ११ केभी लाइन विस्तार गरी आज (बुधबार) देखि चार्ज गरिएको वितरण केन्द्र प्रमुख शिवनारायण गोशेलीले बताए । ‘लाइनबाट आलेडाडा र गाउँटोलमा ५०/५० केभिएका २ वटा वितरण ट्रान्सफरमर राखेर सेवा विस्तार गरेका छाैं ,’ उनले ऊर्जा खबरसँग भने, ‘करिब ९६ वटा वितरण पोल ठड्याएर सेवा विस्तार गरिएको छ ।’
विद्युत सेवा विस्तार गर्दा मैतेदास, पथ्थरे, डाडाँटोल, गाउँटोलका करिब १८० घरधुरि प्रत्यक्ष लाभान्वित भएका छन् । यसअघि यो क्षेत्रमा १७ किलोवाटको लघु जलविद्युतबाट विद्युत वितरण भइरहेको थियो । तर, पछिल्लो सयम क्षमता घटेर ९ किलोवाट मात्र विद्युत उत्पादन भइरहेको छ ।
क्षमता घटेपछि यस ठाउँमा ३ वटा मात्र बत्ती बाल्न पाउने नियम थियो तर अहिलो त्यो नियम हटेपछि स्थानीय हर्षित भएको छन् । गाउँमा प्रणालीको विद्युत पुगेपछि बत्ती बाल्न, मोबाईल चार्ज गर्न, विद्युतीय उपकरण चलाउन र कुटानी पिसानी गर्ने मिल सञ्चालन गर्न सहज भएको स्थानीय बताउँछन् ।
यो जिल्ला अन्तर्गत ६ वटा गाउँपालिका र ४ वटा नगरपालिका छन् । जिल्लाका ६ पालिकामा पूर्ण विद्युतीकरण भइसकेको छ । विद्युत पहुँच पुग्न बाँकी तमनखोला र निसी खोला गाउँपालिकामा पनि चालु वर्षभित्र विद्युत सेवा विस्तार गरिनेछ ।
ढोरपाटन नगरपालिका र बढीगाड गाउँपालिाकामा ५० प्रतिशत विद्युतीकरण भइसकेको छ । वितरण केन्द्र अन्तर्गत प्राधिकरणको विद्युत सेवा लिने ३० हजार ८३ ग्राहक छन् ।
.jpg)
