ऊर्जा खबर
काठमाडौं । ईलामामा दुई र सिन्धुपाल्चाेकमा एक जलविद्युतगृह सञ्चालन गरिरहेकाे सानिमा माई हाइड्रोपावर कम्पनीले ४० करोड ६८ लाख रुपैयाँ खुद नाफा कमाएको छ । कम्पनीले सार्वजनिक गरेको गत आर्थिक वर्षको वित्तीय विवरण अनुसार खुद नाफा आर्जन गरेको हो ।
गत आर्थिक वर्षको खुद नाफा अघिल्लो आर्थिक वर्षको सोही अवधिको तुलनामा बढेको कम्पनीले जनाएको छ । कम्पनीका अनुसार अघिल्लो वर्ष ३६ करोड ६८ लाख रुपैयाँ खुद नाफा कमाएको थियो । नाफा बढेपनि विद्युत बिक्रीबाट हुने आम्दानी भने घटेको छ । यो अवधिमा कम्पनीले विद्युत बिक्रीबाट ८५ करोड ३ लाख रुपैयाँ रुपैयाँ आम्दानी गरेको छ । अघिल्लो वर्ष ८६ करोड ७ लाख रुपैयाँ आम्दानी गरेको थियो ।
सानिमा समूहले अहिलेसम्म ३१.५ मेगावाटका ३ आयोजना (माई २२ मेगावाट, माई क्यासकेड ७ मेगावाट, सुनकोसी २.५ मेगावाट) निर्माण गरी सञ्चालनमा ल्याइसकेको छ । अहिले २८.१ मेगावाटको तल्लो लिखु, ७३ मेगावाटको मध्यतमोर र १४.९ मेगावाटको माथिल्लो मैलुङ निर्माण गरिरहेको छ ।
५६ मेगावाटको जुम खोला निर्माण गर्न अनुमति पाएको छ । यस्तै, २८५ मेगावाटको माथिल्लो तमोरले उत्पादन अनुमतिपत्र लिएको छ भने ७.५ मेगावाटको माथिल्लो मैलुङ ’बी’ अध्ययन भइरहेको छ ।
यस्तै, गत वर्ष अरुण काबेली पावरले २८ करोड ९७ लाख रुपैयाँ खुद नाफा कमाएको छ । यो कम्पनीको नाफा अघिल्लो वर्षको तुलनामा बढेको हो । अघिल्लो वर्ष १० करोड ७९ लाख रुपैयाँ खुद नाफा कमाएको थियो । यो कम्पनीको विद्युत बिक्रीबाट हुने आम्दानी बढेसँगै नाफा पनि बढेको कम्पनीले जनाएको छ । यो अवधिमा कम्पनीले विद्युत बिक्रीबाट ७० करोड ६७ लाख रुपैयाँ आम्दानी गरेको छ ।
अघिल्लो वर्ष नोक्सानमा रहेको आँखु खोला जलविद्युत कम्पनीले पनि १० लाख ५२ हजार रुपैयाँ खुद नाफा कमाएको छ । शिव श्री हाइड्रोपावरले १ करोड ८४ लाख र रुरु जलविद्युत कम्पनीले ७ करोड २१ लाख रुपैयाँ खुद नाफा कमाएको छ ।
