ऊर्जा खबर
काठमाडौं । नेपाल विद्युत प्राधिकरणले मनाङ जिल्लाको २७०० मिटर उचाइमा अवस्थित सदरमुकाम सामे बजारमा विद्युत पुर्याएको छ । प्राधिकरण मनाङ वितरण केन्द्रले करिब साढे ६ किलोमिटर प्रसारण लाइन निर्माण गरी बुधबारबाट सामे क्षेत्रका ग्राहकलाई विद्युत उपलब्ध गराएको हो ।
३३/११ केभीको स्यार्कू सबस्टेसन चार्ज भएसँगै सामे बजारमा गुणस्तरीय विद्युत आपूर्ति भएको केन्द्र प्रमुख मिलन सुवेदीले बताए । उनका अनुसार २ वर्षअघि देखि निर्माण सुरु गरिएको सबस्टेसनको काम सम्पन्न गरी सञ्चालन गरिएको हो।
गत असार परेको अविरल वर्षाले मनाङको विद्युत संरचनाका पूर्वाधारहरू तथा सडक सञ्जालमा ठूलो क्षति भइ सेवा बन्द भएकाे थियो । विद्युत आपूर्तिमा आएको अवरोधका कारण जिल्लाका सरकारी कार्यालयहरूबाट प्रवाह हुने अत्यावश्यक सेवाहरू समेत नियमित रूपमा सञ्चालन गर्न असहज भएको थियो ।
बाढीले क्षति पुर्याउँदा प्राधिकरणको ३ करोड रपैयाँ बढीको क्षति भएको थियो । क्षतिग्रस्त लाइनको पुन निर्माणको काम २०७९ बैशाखभित्रै सम्पन्न भएको थियो ।
अहिले यस क्षेत्रका करिब ९० घरधुरी लाभान्वित भएका छन् । यी ट्रान्सफर्मरबाट विद्युतीकरण हुने तिलिचो तालसम्मको र थोरङ बेस क्याम्पसम्म लाइन विस्तारको काम अघि बढेको छ । लाइन निर्माणका लागि ठेक्का सम्झौताको काम अन्तिम चरणमा पुगेको छ ।
