ऊर्जा खबर
काठमाडौं । ४ मेगावाटको माथिल्लो छ्याङ्दी जलविद्युत आयोजनाले व्यापारिक उत्पादन सुरु गरेको छ । छ्याङ्दी हाइड्रो पावर कम्पनीले लमजुङमा निर्माण सम्पन्न गरेको जलविद्युत आयोजनाले व्यापारिक विद्युत उत्पादन सुरु गरेको हो ।
आयोजनाले उत्पादन गरेको विद्युत नेपाल विद्युत प्राधिकरणको उदिपुर सबस्टेसनमा जोडिएको कम्पनीका प्रमुख कार्यकारी अधिकृत एलपी थापाले बताए । उनका अनुसार आयोजनाबाट गत शुक्रबार (मंसिर २४ गते) देखि व्यापारीक उत्पादन सुरु भएका हो ।
‘मंसिर ७ गतेबाट परीक्षण उत्पादन सुरु गरेका थियाैं,’ उनले ऊर्जा खबर सँग भने, ‘विद्युत खरिद सम्झौता (पिपिए) मा भएकाे व्यवस्था अनुसार परीक्षणकाे चरण पूरा भएपछि व्यापारिक उत्पादन सुरु गरिएको छ ।’ उनले २ सातासम्म आयोजनाबाट परीक्षण उत्पादन गरी प्राधिकरणलाई निशुल्क विद्युत दिएको बताए ।
प्रवर्द्धक कम्पनीले वार्षिक २१.६३ गिगावाट घन्टा विद्युत प्राधिकरणलाई बिक्री गर्नेछ । यसअघि आयोजनाबाट २०७७ चैतदेखि नै उत्पादन सुरु गर्ने भनिए पनि कोरोना (कोभिड–१९) महमारीका कारण निर्माण प्रभावित हुँदा लक्ष्यभन्दा ७ महिना ढिलो गरी विद्युत प्रसारण प्रणालीमा जोडिएको हो ।
विद्युत प्राधिकरणसँग भएको पिपिए अनुसार आयोजनाबाट २०७८ भदौदेखि विद्युत उत्पादन गर्नुपर्नेमा लक्ष्यभन्दा ५ महिना अघि उत्पादन सुरु गर्ने दाबी कम्पनीले गरेको थियो ।
कोरोना महामारी र बर्खाका कारण प्राधिकरणले दिएको तालिकाभन्दा २ महिना ढिलो गरी आयोजनाले उत्पादन सुरु गरेको छ । यो आयोजना सम्पन्न हुँदा ७९ करोड रुपैयाँ खर्च भएको अनुमान छ । आयोजनामा ५६ करोड रुपैयाँ ऋण र २३ करोड रुपैयाँ स्वपुँजी लगानी छ । आयोजनामा बैंक अफ काठमाडौंको अगुवाईमा कुमारी बैंकले पनि ऋण लगानी गरेको छ ।
कम्पनीले स्वपुँजी लगानीका ८ लाख ९० हजार कित्ता (३० प्रतिशत) हकप्रद सेयर निष्कासन गर्ने प्रक्रिया अघि बढाएको छ । कम्पनीले यसअघि निर्माण गरेको २ मेगावाटको छ्याङ्दी खोला साना जलविद्युत आयोजना निर्माण सम्पन्न भई सञ्चालनमा छ ।
