ऊर्जा खबर
काठमाडौँ । विराटनगर वितरण केन्द्रअन्तर्गत मोरङको दुहबीमा रहेको १३२/३३ केभी दुहबी ग्रिड सबस्टेसनमा रहेको ३३ केभी कटहरी फिडरको करेन्ट ट्रान्सफर्मर पड्किँदा सो क्षेत्रमा विद्युत् सेवा अवरुद्ध हुन पुगेको छ ।
आइतबार बिहान साढे ११ बजेतिर उक्त करेन्ट ट्रान्सफर्मरमा सर्प चढ्दा उक्त घटना भएको केन्द्रका इन्जिनियर राजेन्द्रप्रसाद चौधरीले ऊर्जा खबरसँग बताए । उनका अनुसार ट्रान्सफर्मर पड्किएको ठाउँबाट सर्प झिकिएको छ ।
‘घटना भएको केही समयपछि नै हामीले अर्को फिडरबाट गार्हस्थ्य उपभोक्तालाई विद्युत् विद्युत् आपूर्ति सुचारु गरिसकेका छौँ,’ उनले भने, ‘हाल जुबी, सिंघिया र बाङ्गे गरी २ वटा ११ केभीका औद्योगिक फिडरमा विद्युत् अवरुद्ध रहेको छ ।’
कटहरीबाट करेन्ट ट्रान्सफर्मर लगेर बदल्ने कार्य जारी रहेको र साँझसम्म तीन वटै औद्योगिक फिडरमा समेत विद्युत् आपूर्ति सुचारु हुने उनले बताए ।
.jpg)
