ऊर्जा खबर
काठमाडौं । नविल बैंक लिमिटेडका ३९ शाखा कार्यालयहरू सोमबार २ बजेसम्म खुल्ला रहने भएका छन् । विश्वव्यापी रूपमा फैलिएको कोरोना भाइरसको रोकथाम तथा नियन्त्रणका लागि गरिएको लकडाउनका कारण बन्द रहेको बैंक आज खुल्ला गरिएको हो ।
सोमबार ७ वटै प्रदेशमा शाखा कार्यालयहरू खुल्ला रहने बैंकले जनाएको छ । बैंकका अनुसार प्रदेश १ का ४ वटा शाखा कार्यालयहरू खुल्ला रहनेछ । यस प्रदेशको चन्द्रगढी, धरान र उर्लाबारी शाखा २ बजेसम्म खुल्ला रहनेछ । धनकुटाको हिले शाखा बिहान ८ बजे खोलेर ११ बजे बन्द गरिएको छ ।
यस्तै, प्रदेश २ को बर्दीबास, बिरगंज, जनकपुर, लाहान, गोलबजार पावरहाउस, सिरहा र सिमरा शाखाको बैंक खुल्ला छन् । बागमती प्रदेशको अत्तरखेल, बालाजु, हात्तीगौंडा, पनौती, सूर्यविनायक, तीनधारा र त्रिपुरेश्वर शाखा खुल्ला छन् ।
गण्डकी प्रदेशको बेँसीसहर पनि २ बजेसम्म खुल्ला रहनेछ । बिरौटा, दलदले, गैडाकोट, कावासोती र बगर, पोखरा शाखा कार्यालय भने १२ बजेसम्म मात्र खुल्ला गरिनेछ । लुम्बिनी प्रदेशको चन्द्रौटा र कोहलपुर शाखा १ बजेसम्म खुल्ला रहनेछन् ।
कर्णाली प्रदेशमा बराहताल, दार्मा, पचालझरना र पलाता शाखा खुल्ला छन् । सुदूरपश्चिमको आलिताल, पञ्चेश्वर, रामारोशन, सायल र तुर्माखाँद पनि खुल्ला गरिएको छ । वित्थडचिर शाखा भने बिहान ७ बजेदेखि खुल्ला गरी १० बजे बन्द गरिएको बैंकले जनाएको छ ।
