ऊर्जा खबर
काठमाडौँ । डेडिकेटेड फिडर तथा ट्रंक लाइनबाट विद्युत् उपभोग गरेका ५ उद्योगले बक्यौता विद्युत् महसुल तिर्न थालेका छन् । बाराको सिमरामा सञ्चालित हुलास स्टिल इन्डस्ट्रिज, अशोक स्टिल इन्डस्ट्रिज, सम्राट सिमेन्ट, रोल्पा सिमेन्ट र नव नेपाल प्लास्टिक इन्डस्ट्रिजले विद्युत्को प्रिमियम महसुलबापतको बक्यौता रकम भुक्तानी गर्न थालेको नेपाल विद्युत् प्राधिकरणले जानकारी दिएको छ ।
हुलासले २०७२ माघदेखि २०७५ वैशाखसम्मको प्रिमियम दरको विद्युत् प्रयोग रेबापतको बक्यौता रकम कुल १४ करोड १२ लाख रुपैयाँ रहेको थियो । यो बक्यौता रकमलाई प्रतिकिस्ता ५० लाख ४३ हजार रुपैयाँका दरले २८ किस्तामा बुझाउने स्वीकृति प्राधिकरणबाट पाएको छ । उक्त स्वीकृति अनुसार नै उद्योगले शुक्रबार पहिलो किस्ता बुझाएको प्राधिकरणका कार्यकारी निर्देशक मनोज सिलवाले जानकारी दिए ।
त्यस्तै, सिमरामै सञ्चालित अशोक स्टिलको १७ करोड ५८ लाख रुपैयाँ बक्यौता रहेकोमा २६ किस्तामा बक्यौता चुक्ता गर्ने गरी पहिलो किस्ताको ६३ लाख रुपैयाँ बुझाएको छ ।
बक्यौता तिर्न २८ किस्ताकै सुविधा लिई केही किस्ता बुझाएपछि गत वैशाखदेखि किस्ता बुझाउन छोडेका सम्राट सिमेन्ट, रोल्पा सिमेन्ट र नव नेपाल प्लास्टिक इन्डस्ट्रिजले पनि बाँकी किस्ता तिर्न थालेका छन् ।
सम्राट सिमेन्टले २०७२ माघदेखि २०७५ वैशाखसम्ममा प्रिमियम महसुल दरमा खपत गरेको विद्युत्को ३ करोड ७७ लाख बक्यौता राखेको थियो । उक्त रकमलई प्रतिकिस्ता मासिक १३ लाख ४९ हजार रुपैयाँका दरले २८ किस्तामा बुझाउने स्वीकृति लिएर ४ किस्ता बुझाएपछि तिर्न छोडेको थियो । स्वीकृत किस्ता सुविधा बमोजिम गत असारबाट असोजसम्म ११ किस्ता बुझाउनु पर्नेमा सात किस्ता मात्र बुझाएको थियो । बाँकी ४ किस्ताको ५३ लाख ९६ हजार रुपैयाँ बुझाउन पुनः पत्राचार गरिएको थियो । त्यसै अनुसार उद्योगले बाँकी ४ किस्ताको रकम बुझाएको र अब नियमित किस्ता तिर्ने जनएको प्राधिकरणको प्रदेश डिभिजन कार्यालय नेपालगञ्जका प्रमुख दीपक गौतमले जानकारी दिए ।
यसैगरी, रोल्पा सिमेन्टले कुल बक्यौता महसुल ९९ लाख १२ हजार रुपैयाँ रहेकोमा प्रतिकिस्ता ३ लाख ५४ हजार रुपैयाँ एक मासिक किस्ता हुने गरी २८ किस्तामा बुझाउने स्वीकृति प्राधिकरणबाट लिएको थियो । ६ किस्ता तिरेपछि उद्योगले तिर्न छाडेको थियो । उद्योगले पाँच किस्ताको १७ लाख ७० हजार रुपैयाँ एकैपल्ट तिरी अब १७ किस्ता नियमित तिर्ने जनाएको छ ।
त्यस्तै, नव नेपाल प्लास्टिक इन्डस्ट्रिज १२ किस्ताको १ लाख २३ हजार रुपैयाँ तिरेर बक्यौता रकम चुक्ता गरेको छ प्राधिकरणले जनाएको छ ।
.jpg)
