धनगढीमाई नगरपालिकाले सिँचाइ मिटरकाे १८ लाख महसुल बुझायो

काठमाडौं । सिराहा जिल्लाको धनगढीमाई नगरपालिकाले नेपाल विद्युत प्राधिकरण लहान वितरण केन्द्रलाई साढे १८ लाख रुपैयाँ बक्यौता बुझाएको छ । नगरपालिकाले सिँचाइ मिटरबाट विद्युत खपत गरेवापतको सो रकम बुझाएको हो ।

नगरपालिकाका मेयर शिव शंकर महतोले पालिका अन्तर्गतका ग्राहकले सिँचाइ मिटरबाट विद्युत खपत गरेबापत १८ लाख २२ हजार ६ सय १४ रुपैयाँ रकम बुझाएको केन्द्रका इन्जिनियर संयोग विश्वकर्माले बताए ।  नगरपालिकाले १४ वटा वडाका सिँचाइ महुसुल बक्यौता बुझाएको छ ।

‘नगरपालिका अन्तर्गतका केही ग्राहकले भने सिँचाइकाे महसुल आफैले बुझाएका थिए,’ उनले भने, ‘मिटर रिडिङ गर्दा बाँकी रहेका ग्राहकको बक्यौता नगरपालिकाले बुझाएको हाे ।’ आगामी दिनमा नगरपालिका अन्तर्गत सिँचाइ गरेबापत खपत भएकाे विद्युतकाे महसुल नगरपालिकाले नै तिर्नेछ ।

नगरपालिकाले किसानहरूको मिटर जडान गरेदेखि २०८० असारसम्मको बाँकी रहको बक्यौता बुझाएको हो  ।