ऊर्जा खबर
चितवन । नेपाल विद्युत् प्राधिकरण भरतपुर वितरण केन्द्रले २६७ ग्राहकलाई कालोसूचीमा राखेको छ । ६ महिनासम्म पनि बक्यौता रकम नबुझाउने ग्राहकलाई केन्द्रले कालोसूचीमा राखेको हो ।
कालोसूचीमा परेका ग्राहकबाट ७३ लाख ३ हजार बक्यौता उठाउन बाँकी छ । कार्यालयका इञ्जिनीयर राजेन्द्र पौडेलका अनुसार घरायसी बिजुली उपभोग गर्ने २१४ ग्राहक कालोसूचीमा परेका छन् । यस्तै ३९ वटा उद्योग, ६ वटा संस्थागत, ३ वटा पानी उद्योगलाई पनि कालो सूचीमा राखिएको छ ।
लामो समयसम्म बक्यौता रकम नतिर्ने ग्राहकलाई कालोसूचीमा राख्ने र २ महिनासम्म महसुल नबुझाउने ग्राहकको लाइन काट्ने काम सुरु गरिएको उनले बताए । २ महिनासम्म विद्युत् महसुल नबुझाउने ग्राहकको लाइन काट्ने काम आइतबारदेखि सुरु गरिएकामा पहिलो दिन विद्युत् महसुल धेरै बाँकी रहेका १० ग्राहकको लाइन काटिएको छ ।
लाइन काटेसँगै कतिपयले रकम भुक्तानी गरिसकेका छन् । प्राधिकरणका कर्मचारीले विद्युत् मिटर बक्स रिडिङ गरेको २ महिनासम्म महसुल नबुझाउने ग्राहकको लाइन काट्न थालेको हो । इञ्जिनीयर पौडेलले थपे, ‘सुरुवातमा विद्युत् महसुल धेरै भएका ग्राहकको लाइन काटिनेछ । कम्तीमा १० हजारसम्म तिर्न बाँकी रहेका ग्राहकको लाइन काट्ने गरी काम अघि बढाएका छौँ ।’
२ महिना नाघेका ग्राहकबाट मात्रै ३५ करोड ४१ लाख ५३ हजार शुल्क उठ्न बाँकी रहेको उनले जानकारी दिए । २ वर्षभन्दा माथिको १० करोड ५६ लाख ४४ हजार बक्यौता रकम उठाउन बाँकी छ । कार्यालयले चालु आर्थिक वर्षसम्म ४३ करोड ५५ लाख ७८ हजार विद्युत् महसुल उठाउन बाँकी रहेको इञ्जिनीयर पौडेलले बताए ।
दुई महिनादेखि छ महिनासम्म महसुल नतिर्ने ग्राहकबाट ४ करोड ९८ लाख २० हजार, ६ महिनादेखि १२ महिनासम्मको महसुल नतिर्ने ग्राहकबाट २ करोड ८ लाख २८ हजार, १ वर्षदेखि २ वर्षसम्मको महसुल नबुझाउने ग्राहकबाट ३ करोड २९ लाख ५८ हजार उठ्न बाँकी छ ।
.jpg)
