ऊर्जा खबर
दाेलखा । रामेछाप जिल्लाको जिरी र बैतेश्वर गाउँपालिकाको विद्युत आपूर्ति सुधार गर्नका लागि निर्माण गरिएको ३३/११ केभी जिरी सबस्टेसन चार्ज भएको छ । नेपाल विद्युत प्राधिकरणले सञ्चालित १३२/३३ केभी गर्जाङ सबस्टेसनदेखि जिरी सबस्टसनसम्मकाे लाइन र सबस्टेसन चार्ज गरेको हो ।
प्राधिकरणले निर्माण गरेको सबस्टेसन बुधबार (असाेज ३ गते) देखि चार्ज गरेको दोलखा वितरण केन्द्रका प्रमुख मेघनाथ ढकालले बताए । ‘लामो प्रयासपछि गर्जाङ सबस्टेसनबाट जिरीमा विद्युत ल्याउन सफल भएका छाैँ,’ उनले भने, ‘यसअघि लामोसाँघु र खिम्ती सबस्टेसनबाट जिरी सबस्टेसनमा लाइन चार्ज हुने गरेको थियो ।’
‘लामो प्रसारण लाइन, हावाहुरीका कारण समयमा मर्मत गर्न लामो समय लाग्ने हुँदा जिरी र बैतेश्वर क्षेत्रमा विद्युत समस्या हुँदै आएको थियो, गर्जाङबाट जिरी छोटो दुरी भएकाले अब सामान्य समस्या आउँदा पनि तुरुन्त मर्मत गर्न सकिने ढकालले बताए ।
जिरी नगरपालिका वडा नम्बर १ को सिमाना भएर बग्ने खिम्ती खोलामा ३ वटा जलविद्युत आयोजनाबाट २२ मेगावाट विद्युत उत्पादन हुँदै आएको छ । गाउँ नजिकै गर्जाङ-खिम्ती १३२ केभी क्षमताको सबस्टेसन समेत रहेको छ । विद्युत गृह र सबस्टेसनको नजिकैको गाउँमा विद्युत समस्या हुनु बत्तीमुनी अध्यारो भएको स्थानीयको गुनासो अन्त्य भएको उनले बताए । विद्युतको समस्या लामो समयदेखि जिरी नगरपालिका र बैतेश्वर गाउँपालिका क्षेत्रका उपभोक्ताले भोग्दै आएका थिए ।
जिरी सबस्टेसनबाटै जिरी नगरपालिका र बैतेश्वर गाउँपालिका क्षेत्रमा विद्युत वितरण हुँदै गरेकोमा अब बैतेश्वरको नाम्दुमा पनि ३३/११ केभीको सबस्टेसन अन्तिम चरणमा पुगेको छ । यो सबस्टेसनबाट बैतेश्वर गाउँपालिका र गौरीशंकर गाउँपालिकाको वडा नम्बर १ र २ मा विद्युत अझै भरपर्दो हुनेछ । वैतेश्वर सबस्टेसन चार्ज भएपछि दोलखा जिल्लाभरको विद्युत सेवा देशमै सबैभन्दा भरपर्दो हुने उनले दाबी गरे ।
दोलखामा लामोसाँघु, सिंगटी, खिम्ती र गर्जाङ सबस्टेसनबाट विद्युत जोडिएकाले एउटा लाइनमा समस्या आए पनि तुरुन्तै अर्को लाइनबाट चार्ज गर्न सकिन्छ । विद्युत उत्पादनको हबको रुपमा रहेको दोलखामा वितरण लाइन पनि भरपर्दो हुँदै गएको छ ।
.jpg)
