ऊर्जा खबर
काठमाडौं । स्वतन्त्र ऊर्जा उत्पादकहरूको संस्था नेपाल (इपान) ले तेस्रो हिमालयन हाइड्रो एक्स्पो गर्ने घोषणासँगै यसको तयारी सुरु गरेको छ । ऊर्जा, तथा जलविद्युत प्रवद्र्धक, लगानीकर्ता, उपकरण उत्पादक कम्पनी लगायत पक्षलाई एकै छानोमुनि जम्मा गरेर यस क्षेत्रको विकास गर्ने हेतुले तयारी अगाडि बढाइएको हो ।
इपानका अनुसार आगामी चैत १८ गतेदेखि २० गतेसम्म एक्स्पोको आयोजना गरिने भएको छ । इपानले आफ्नो स्थापनाको १९औं र २०औं वार्षिक साधारणसभाका क्रममा यसको घोषणा गरिसकेको हुँदा तयारी थालिएको जनाएको छ । इपानले एक्स्पोका लागि सहकार्य गर्न एक्स्पो एन्ड हाइड्रो इभेन्ट म्यानेजमेन्ट सर्भिस प्रालिसँगको सहकार्यमा काम गर्ने भएको छ ।
एक्स्पो गर्ने विषयमा इपानका महासचिव गोरे शेर्पा र कम्पनीका अध्यक्ष विजयसागर प्रधानबीच सम्झौता भइसकेको छ । पहिलो र दोस्रो एक्स्पो गरिसकेको इपानले तेस्रो संस्करणको एक्स्पो गर्न लागेको छ । जसमा, ५० हजार अवलोकनकर्ता जम्मा गर्ने लक्ष्य राखिएको छ ।
पहिलो एक्स्पो २०७४ पुस २१ गतेदेखि २३ गतेसम्म र दोस्रो २०७५ माघ ४ गतेदेखि ६ गतेसम्म काठमाडौंको भृकुटीमण्डपमा भएको थियो । ती दुई एक्स्पोमा चीन, भारत, अष्ट्रिया, कोरिया, स्वीडेन, जर्मनी, बुल्गेरिया, बेलायत लगायत देशको सहभागीता थियो । जसमा ८५ भन्दा बढी स्टल राखिएका थिए । तेस्रोमा यो भन्दा बढी सहभागिता हुने दाबी गरिएको छ ।
इपानले गरेको पहिलो र दोस्रो एक्स्पोबाट के कति उपलब्धि हासिल गर्यो भन्ने विषयमा लेखाजोखा गरेको छैन । पहिलोको अपेक्षा के थियो ? कति उपलब्धि हासिल भयो र कमजोरी के के भए भन्ने विषयमा विमर्श गरी बाहिर ल्याउने काम पनि भएको छैन । यसैगरी, दोस्रोबाट के कति उपलब्धि हासिल भयो र तेस्रोबाट के हाँसिल गर्ने भन्नेमा भने इपान प्रस्ट देखिएको छैन ।
