ऊर्जा खबर
काठमाडौँ । विद्युत् नियमन आयोगले तयार पारी सार्वजनिक गरेको विद्युत् नियमन आयोग खुला पहुँच निर्देशिका, २०८२ को मस्यौदाउपर राय–सुझाव उपलब्ध गराउने म्याद १५ दिन थप गरिएको छ । आयोगले सोमबार सूचना जारी गरी यस्तो जानकारी गराएको हो ।
यसअघि आयोगले उक्त निर्देशिकाको मस्यौदा उपर राय–सुझाव लिन २०८२ असार ४ गतेदेखि ३० दिनको समय निर्धारण गरेको थियो । उक्त मस्यौदामाथि सम्बन्धित निकाय, विज्ञ तथा सरोकारवालाहरूबाट आयोगले सुझावको अपेक्षा गरेको छ । थपिएको म्याद अनुसार साउन १९ गतेसम्म राय–सुझाव दिने समय थप भएको छ ।
विद्युत् प्रसारण, वितरण पूर्वाधार तथा प्रसारण प्रणालीमा स्वामित्व राख्ने निकाय वा संस्थाबाहेक विद्युत् उत्पादक, विद्युत् व्यापारमा संलग्न कम्पनी तथा ठूला विद्युत् उपभोक्ता समेतले विभेदरहित रूपमा विद्युत् प्रणाली प्रयोग गरेर बिजुली खरिद वा बिक्री गर्न पाउने व्यवस्था नै खुला पहुँच हो ।
यो निर्देशिका लागु भएपछि प्राधिकरणबाहेकका ठूला विद्युत् उत्पादक, विद्युत् व्यापारी तथा विद्युत् खपतकर्ता समेतले तोकिएको शुल्क तिरेर देशमा उपलब्ध प्रसारण तथा वितरण प्रणालीको प्रयोग गरी विद्युत्को खरिद–बिक्री गर्न सक्ने अधिकार पाउने छन् ।
