ऊर्जा खबर
काठमाडौं । नेपालको प्रतिव्यक्ति विद्युत् खपत गत आर्थिक वर्ष (आव) मा ५.९८ प्रतिशतले बढ्न गई ४१८.३१ युनिट पुगेको छ ।
नेपाल विद्युत प्राधिकरणको वार्षिक प्रतिवेदन अनुसार, आव २०२५÷२६ को शुरुवातमा प्रतिव्यक्ति विद्युत् खपत ३९४.६९ युनिट रहेको थियो । एक वर्षको समयमा प्रतिव्यक्ति विद्युत् खपतमा २३.६२ युनिटले वृद्धि भएको देखिन्छ ।
विद्युत् प्रयोगकर्ताको संख्यामा भएको वृद्धिसँगै औसत बिजुली खपतमा पनि वृद्धि भएको प्राधिकरणले जनाएको छ । प्राधिकरणको तथ्याङ्क अनुसार विद्युत उपभोक्ताको संख्यामा गत वर्ष ३.३२ प्रतिशतले वृद्धि भएको थियो । प्रयोगकर्ताको कुल संख्यामा २०५,१६३ ले वृद्धि हुन गई ६३ लाख ८३ हजार ९१६ पुगेको छ । यो संख्या अघिल्लो आवमा ६१ लाख ७८ हजार ७५३ थियो । ।
कुल विद्युत् प्रयोगकर्तामध्ये ५९ लाख २७ हजार ४४० घरधुरीले प्रत्यक्ष रूपमा नेपाल विद्युत् प्राधिकरणद्धारा वितरित बिजुली प्राप्त गर्छन् भने ४५६,४७६ घरपरिवारले सामुदायिक तथा ग्रामीण विद्युतीकरण कार्यक्रम मार्फत सेवा प्राप्त गर्छन् ।
प्राधिकरणका अनुसार विगत छ वर्षमा विद्युत् प्रयोगकर्ताको संख्या उल्लेखनीय रूपमा विस्तार भएको छ । उक्त अवधिमा प्रयोगकर्ताको संख्या ४५ लाख २८ हजार ४११ बाट बढेर ६३ लाख ३३ हजारभन्दा बढी पुगेको छ ।
प्राधिकरणको पछिल्लो तथ्याङ्कले राष्ट्रिय विद्युत प्रणालीमा पहुँच विस्तार हुँदै जाँदा उपभोक्ता संख्याको वृद्धिसँगै विद्युत् मागमा समेत निरन्तर वृद्धि भइरहेको जनाएको छ । गत आव २०२५÷२६ मा विद्युत् बिक्री ९.६४ प्रतिशतले बढेर १२ अर्ब ३७ करोड ६५ लाख ८२ हजार युनिट पुगेको छ, जुन अघिल्लो आवमा ११ अर्ब २८ करोड ८२ लाख ६८ हजार युनिट मापन गरिएको थियो ।
