ऊर्जा खबर
काठमाडौं । खोटाङको हलेसीमा ६.६ मेगावाटको साप्सु खोला जलविद्युत आयोजना निर्माण गरी सञ्चालन गरिरहेको थ्रीस्टार हाइड्रो पावर कम्पनीले साधारण सेयर निष्कासन गरेको छ । कम्पनीले आयोजना प्रभावित स्थानीय र वैदेशिक रोजगारीमा रहेका नेपाली नागरिकहरूका लागि सोमबार (बैशाख ११ गते) देखि सेयर बिक्री खुल्ला गरेको हो ।
कम्पनीले स्थानीय बासिन्दाहरूका लागि जारी पुँजी ४९ करोड २५ लाख रुपैयाँको १० प्रतिशत अर्थात् ४ करोड ९२ लाख ५० हजार रुपैयाँ बराबरको ४ लाख ९२ हजार ५ सय कित्ता सेयर बिक्री गरेको छ ।
आयोजनाको सेयर खरिद गर्न हलेसी तुवाचुङ नगरपालिका वडा नम्बर १ देखि ११ सम्म र दिप्रुङ चुईचुम्मा गाउँपालिका वडा नम्बर १ देखि ७ सम्मका बासिन्दाले आवेदन दिन सक्नेछन् । यस्तै, कम्पनीले सर्वसाधारणलाई छुट्याइएको १५ प्रतिशत अर्थात् ७ करोड ३८ लाख ७५ हजार रुपैयाँको १० प्रतिशतले हुन आउने ७३ लाख ८७ हजार ५ सय रुपैयाँ बराबरको ७३ हजार ८७५ कित्ता सेयर वैदेशिक रोजगारीमा रहेका नेपालीहरूलाई बिक्री खुल्ला गरेको छ ।
स्थानीय वासिन्दा र वैदेशिक रोजगारीमा रहेका नेपालीले न्यूनतम १० कित्ताका लागि आवेदन दिन सक्नेछन् । अधिकतममा स्थानीयले ४ लाख ९२ हजार ५ सय कित्ता र वैदेशिक रोजगारीमा रहेका नेपालीले ७३ हजार ८ सय ७५ कित्ताका लागि आवेदन दिन सक्ने कम्पनीले जनाएको छ ।
कम्पनीको सेयरमा आगामी २५ गतेसम्म आवेदन दिन सकिनेछ । स्थानीइले ढिलो मा भने जेठ ९ गतेसम्म आवेदन दिन सक्ने कम्पनीले जनाएको छ । कम्पनीको सेयर निष्कासन बाँडफाँड गर्न बिक्री प्रबन्धकमा हिमालयन क्यापिटल रहेको छ ।
स्थानीय लगानीकर्ताले सानिमा, राष्ट्रिय वाणिज्य, ग्लोबल आइएमई, ज्योति विकास, प्रभु र थ्रीस्टार हाइड्रो पावरको कार्यालयबाट आवेदन दिन सक्नेछन् । यसैगरी, नेपाल धितोपत्र बोर्डबाट सी–आस्बा सेवा अनुमति प्राप्त बैंक तथा वित्तीय संस्था र तिनका शाखा कार्यालयबाट आवेदन दिन सक्नेछन् ।
.jpg)