ऊर्जा खबर
काठमाडौ । निलगिरी खोला हाइड्रो पावर कम्पनीले निर्माणाधीन २ जलविद्युत आयोजनाकाे विद्युत प्रणालीमा जाेड्न साढे ७ किलाेमिटर लामाे २२० केभी प्रसारण लाइन निर्माण गर्ने भएको छ । कम्पनीले निर्माणाधीन ३८ मेगावाटको निलगिरी खोला–१ र ६२ मेगावाटको निलगिरी खोला–२ जलविद्युत आयोजनाबाट उत्पादन हुने विद्युत २२० केभी बनखेत सबस्टेसनमा जोड्न प्रसारण लाइन निर्माणकाे प्रकृया अघि बढाएको हो ।
विद्युत विकास विभागले प्रसारण लाइन निर्माण गर्न कम्पनीकाे नाममा अनुमति दिने प्रकृया अन्तिम चरणमा पुर्याएकाे छ । विभागले विद्युत ऐन २०४९ को दफा ४ को व्यवस्था अनुसार विद्युत नियमावली २०५० को नियम १३ बमोजिम कम्पनीलाई अनुमतिपत्र दिन लागेकाे हाे ।
कम्पनीलाई अनुमतिपत्र दिन विभागले ३५ दिने सार्वजनिक सूचना जारी गरेको छ । विभागले अनुमतिपत्र दिनुअघि प्रसारण लाइन निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय/सुझाव मागेको छ । विभाग तथा कम्पनीको कार्यालयमा आइपुग्ने गरी राय/सुझाव मागिएको हो ।
गण्डकी प्रदेशक, म्याग्दी जिल्लाको अन्नपूर्ण गाउँपालिकामा निर्माणाधीन निलगिरी खोला–१ को स्वीचयार्डदेखि निलगिरी खोला–२ को स्वीचयार्डसम्म करिब ५ किलोमिटर सिंगल सर्किट प्रसारण लाइन निर्माण हुने कम्पनीले जनाएको छ । कम्पनीका अनुसार निलगिरी–२ को स्वीचयार्डदेखि नेपाल विद्युत प्राधिकरणको सबस्टेसनसम्म करिब २.४ किलोमिटर डबल सर्किट लाइन निर्माण हुनेछ ।
निर्माण हुने ७.४ किलोमिटर लाइनमा २४ वटा टावर खडा गरिनेछ । एउटा टावरदेखि अर्को टावरसम्मको दुरी १६१ देखि ४६४ मिटरसम्म हुनेछ । निर्माण सुरु भएको साढे २ वर्षमा प्रसारण लाइन सम्पन्न गर्ने लक्ष्य छ । प्रसारण लाइन पूरा भएपछि निलगिरी बेसिनमा निर्माणाधीन १ सय ९ मेगावाटका आयोजनाको विद्युत प्रवाह गर्न सकिनेछ ।
