ऊर्जा खबर
काठमाडौं– मनकामना केवलकारमा ३ डब्बा थपिएका छन् । मनकामना मन्दिर दर्शन गर्न आउने दर्शनार्थीको चाप बढेपछि डब्बा थप गरिएको हो ।
अब केवलकारमा डब्बाको संख्या बढेर ३४ पुगेको मनकामना केवलकार प्रालिका सञ्चालक राजेशबाबु श्रेष्ठले बताए । उनका अनुसार अब औसत दैनिक एक हजार दर्शनार्थीले मनकामनाको दर्शन गर्न पाउने छन् ।
सोमबार संस्कृति, पर्यटन तथा नागरिक उड्यायन मन्त्री रविन्द्र अधिकारीले थपिएका नयाँ डब्बाको उद्घाटन गरेपछि सञ्चालन गरिएको छ । सेवा विस्तार भएसँगै अब वार्षिक करिब १५ लाख दर्शनार्थीले सजिलै ५ सय वर्ष लामो इतिहास बोकेको हिन्दु धर्मावलम्बीको आस्थाकी देवी मनकामनाको दर्शन गर्न पाउने छन् ।
२०५५को मंसिर ८ गतेबाट सञ्चालनमा आएको केवलकार चढेर अहिलेसम्म १ करोड ३८ लाख १२ हजार ४ सय ६८ जना यात्रुले मन्दिर दर्शन गरेका छन् । पछिल्लो समय केवलकारबाट मनकामना दर्शन गर्न आउने भारतीय पर्यटकको संख्यापनि बढेको छ ।
गत आर्थिक वर्षको तथ्याङ्क अनुसार केवलकार चढ्ने भारतीय पर्यटकको संख्या अघिल्लो आर्थिक वर्षको तुलनामा २१ प्रतिशत वृद्धि भएको छ ।
