आयल निमगले सर्वसाधारणका लागि सेयर निष्कासन गर्दै

काठमाडौं । नेपाल आयल निगमका कार्यकारी निर्देशक उमेशप्रसाद थानीले निगमले सर्वसाधारणका लागि सेयर निष्कासन गर्ने तयारी गरिरहेको बताए । मंगलबार नेपाल एलपी ग्यास उद्योग संघको २८औं वार्षिक साधारणसभामा बोल्दै उनले यस्तो बताएका हुन् ।

‘धितोपत्र निष्कासन नियमावली अनुसार कम्तिमा दुई आर्थिक वर्ष फाइदा भएपछि मात्रै सेयर निष्कासन गर्ने व्यवस्था छ,’ उनले भने, ‘ निगम गत वर्ष पनि नाफामा थियाे, अब जनताकै स्वामित्व बनाउने हो, विभिन्न प्रक्रियागत तयारीहरू गर्नुपर्ने भएकाले सर्वसाधारणलाई सेयरधनी बनाउन केही समय लाग्नेछ ।’ निगमले असार ३१ देखि स्वचालित मूल्य प्रणाली लागू गरेकाले अब दिनमा निगम नाफामै सञ्चालन हुने बताए ।

ग्यास व्यवसायीहरूप्रति आयल निगम निर्मम हुने सोचमा नरहेको थानीको भनाइ छ । सरकारले व्यवसायीका माग समयसापेक्ष रुपमा सम्बोधन गर्ने बताए ।

नेपाल एलपी ग्याँस उद्योग संघका अध्यक्ष कुलप्रसाद मल्लीले एलपी ग्याँसको मूल्य अचानक बढ्दा व्यवसायीलाई समस्या भइरहेको बताए । उनले व्यवसायमा लागत अनुसारको मुनाफा आवश्यक हुने भन्दै आयात र मूल्य सरकारको नियन्त्रणमा हुँदा एलपी ग्याँस उद्योगले विभिन्न समस्या भोग्नुपरेको बताए । ग्यास उद्योगीलाई प्रतिसिलिण्डर नाफा १० वर्ष अगाडिजत्तिकै ३२ रुपैयाँ अहिलेसम्म कायम रहेको गुनासो गरे ।