ऊर्जा खबर
काठमाडौं । गण्डकी प्रदेशकाे पर्वत जिल्लामा रहेकाे मोदी खोला जलविद्युतको हब बन्दै गएको छ । मोदी बेसीनमा अहिले सञ्चालित, निर्माणधीन र निर्माणमा जाने प्रक्रियामा रहेका २३६ मेगावाटका ९ जलविद्युत आयोजना छन् ।
निर्माण सम्पन्न भइसकेका ३ जलविद्युत आयोजनाबाट अहिले विद्युत उत्पादन भइरहेको छ । यो बेसिनमा सञ्चालनमा आएको सबैभन्दा पहिलो आयोजना हो, १४ मेगावाटको मोदी जलविद्युत केन्द्र । यो आयोजना नेपाल विद्युत प्राधिकरणले २०५७ मा निर्माण सम्पन्न गरी सञ्चालनमा ल्याएको थियो ।
यस्तै, युनाइटेड मोदी हाइड्रो पावर कम्पनीले १० मेगावाटको तल्लो मोदी–१ जलविद्युत आयोजना निर्माण सम्पन्न गरी उत्पादन गरिरहेको छ । मोदी इनर्जीले २० मेगावाटको तल्लो मोदी निर्माण पूरा गरी सञ्चालनमा ल्याएको छ ।
यस्तै, १६८ मेगावाटका ५ जलविद्युत आयोजनाले भने अध्ययन पूरा गरेर उत्पादन अनुमति लिएको विद्युत विकास विभागले जनाएको छ । १५.१ मेगावाटको मध्य मोदी, ४२ मेगावाटको माथिलो मोदी–ए, १४ मेगावाटको माथिल्लो मोदी, १०.४ मेगावाटको तल्लो मोदी–२ क्यासकेड र ८६.५९ मेगावाटको लान्द्रुक मोदी जलविद्युत आयोजनाले उत्पादन अनुमति लिइसकेका छन्।
१५.१ मेगावाटको मध्यमोदी जलविद्युत आयोजनाको काम चौधरी ग्रूप अन्तर्गतको मध्य मोदी हाइड्रो पावर कम्पनीले अन्तिम चरण पुर्याएको छ । २०७२ देखि निर्माण सुरु गरेको आयोजना सम्पन्न गर्न करिब २ अर्ब ८० करोड रुपैयाँ लागत अनुमान गरिएको छ ।
यस्तै, ४२ मेगावाटको माथिल्लो मोदी ‘ए’ जलविद्युत आयोजना निर्माण गर्न लगानी सम्झौता सम्पन्न भइसकेको छ । मोदी जलविद्युत कम्पनीले निर्माण गर्न लागेको आयोजनामा एनएमबी बैंक र हाइड्रो इलेक्ट्रिसिटी इन्भेष्टमेन्ट एण्ड डेभलपमेन्ट कम्पनी (एचआईडिसीएल) ले ७० प्रतिशत अर्थात ६ अर्ब ३६ करोड रुपैयाँ लगानी गर्ने भएको छ । आयोजना पूरा गर्न ९ अर्ब ८ करोड रुपैयाँ लागत अनुमान गरिएको छ ।
यस्तै, प्राधिकरणले १४ मेगावाटको माथिल्लो मोदी निर्माण गरिरहेको छ । तल्लो मोदी–१ प्रवद्र्धक युनाइटेड मोदी हाइड्रो पावर कम्पनीले १०.५ मेगावाटको तल्लो मोदी–२ क्यासकेड निर्माण अघि बढाएको छ ।
८६.५९ मेगावाटको ल्याण्डरुक मोदी जलविद्युत आयोजना निर्माण गर्न अन्नपूर्ण विद्युत विकास कम्पनीले अनुमति पाएको छ । अन्नपूर्ण इनर्जी कम्पनीले यही खोलामा २४.६ मेगावाटको माछापुच्छ्रे मोदी जलविद्युत आयोजनाको अध्ययन गरिरहेको छ ।
