ऊर्जा खबर
.jpg)
काठमाडाैं । सिइडिबी हाइड्रो पावर डेभलपमेन्ट कम्पनीले साधारण सेयर निष्कासन गरेकाे छ । कम्पनीले शुक्रबारबाट बिहान १० बजेबाट सर्वसाधारणका लागि छुट्याएको सेयर निष्कासन गरेकाे हाे ।
प्रतिकित्ता सय रुपैयाँ अंकित २५ करोड १८ लाख २३ हजार रुपैयाँ बराबरको २५ लाख १८ हजार २ सय ३० कित्ता सेयर निष्कासन गरिएकाे कम्पनीले जनाएको छ । कम्पनीका अनुसार निष्कासन भएकाे सेयरमध्ये २ प्रतिशत अर्थात ५० हजार ३ सय ६५ कित्ता सेयर कर्मचारीका लागि छुट्याइएको छ ।
यस्तै, ५ प्रतिशत अर्थात १ लाख २५ हजार ९ सय ११ कित्ता सेयर सामुहिक लगानी कोषका लागि सुरक्षित गरिएको छ । बाँकी २३ लाख ४१ हजार ९ सय ५४ कित्ताका लागि सर्वसाधारणले आवेदन दिन पाउनेछन् ।
सर्वसाधारणले न्युनतम १० कित्तादेखि अधिकतम सबै कित्ताका लागि आवेदन दिन पाउनेछन् । आवेदकले छिटोमा बैशाख २१ गतेसम्म र ढिलोमा ३१ गतेसम्म आवेदन दिन पाउनेछन् ।
कम्पनीले सेयर निष्कासन गरी बाँडफाँड गर्न सनराइज क्यापिटललाई बिक्री प्रबन्धक तोकिएको छ । कम्पनीले नेपाल धितोपत्र बोर्डबाट गत बैशाख २ गते सेयर निष्कासनकाे अनुमति पाएको थियो ।
बोर्डमा आवेदन दिएको झण्डै ४ वर्षपछि साधारण सेयर निष्कासनको अनुमति पाएको हो । कम्पनीले २०७४ साल असार २७ गते कम्पनीमा सेयर निष्कासनको अनुमतिका लागि आवेदन दिएको थियो ।
जलविद्युतको विकासमा लगानी गर्ने उद्देश्यले २०६६ साल मंसिर १५ गते यो कम्पनी स्थापना भएको हो । अहिलेसम्ममा कम्पनीले लगानी गरेका ८.५८ मेगावाटका जलविद्युत अयोजनाले विद्युत उत्पादन गरिरहेका छन् । १८३ किलोवाटको स्याङ्गे, ४ मेगावाटको खुदी र ४.४ मेगावाटको राधी सिइडिबीको लगानीका आयोजना हुन् ।
यस्तै, कम्पनीको लगानी भएका ५ जलविद्युत आयोजना अहिले निर्माणाधीन छन् । ११ मेगावाटको तल्लो खारे, १२ मेगावाटको दोर्दी खोला–१, ५ मेगावाटको रुकुमगाड र ४५ मेगावाटको कसुवा खोला निर्माणाधीन छन् । ३० मेगावाटको न्यादी बुटवल पावर कम्पनीसँग लगानी साझेदारीमा निर्माण भइरहेको छ ।
.png)
