ऊर्जा खबर
काठमाडौँ । वैकल्पिक ऊर्जा प्रवर्द्धन केन्द्रले संस्थागत, सामुदायिक तथा व्यावसायिक फोहोरबाट बायोग्यास ऊर्जा उत्पादन गर्नका लागि सहयाेग चाहने स्थानीय तहहरूसँग आशयपत्र माग गरेको छ । आर्थिक वर्ष २०८३/८४ को स्वीकृत वार्षिक कार्यक्रम अनुसार केद्रले शुक्रबार सूचना जारी आशयपत्र आह्वान गरेको हो ।
केन्द्रका अनुसार उक्त कार्यक्रम अन्तर्गत महानगरपालिका, उपमहानगरपालिका, नगरपालिका तथा गाउँपालिकाहरूमा अवस्थित संस्थागत, सामुदायिक र व्यावसायिक फोहोरलाई उपयोग गरी ऊर्जा उत्पादन गर्ने लक्ष्य राखिएको छ । यसअन्तर्गत साना, मझौला तथा ठूला बायोग्यास प्लान्टहरू निर्माणका लागि सहयोग उपलब्ध गराइनेछ । बायोग्यास उत्पादनसँगै त्यसबाट निस्कने लेदोलाई प्राङ्गारिक मलका रूपमा प्रशोधन गरी कृषि बालीनाली तथा खेतबारीमा प्रयोग गर्ने केन्द्रको लक्ष्य छ ।
हालसम्म २० वटा ठूला क्षमताका व्यावसायिक एवं पालिकास्तरका फोहोरबाट बायोग्यास ऊर्जा उत्पादन गर्ने आयोजनाहरू निर्माण भइसकेको जनाइएको छ । यसअघि यस्तो प्रकारको आशयपत्र पेस गरिसकेका पालिकाहरूले पनि यस सूचना बमोजिम पुनः आशयपत्र पेस गर्नुपर्नेछ ।
केन्द्रले काठमाडौँको ताहाचलस्थित कार्यालय वा आधिकारिक इमेलमार्फत आगामी भदौ ४ गते (कार्यालय समयभित्र) सम्म आशयपत्र बुझाउन आह्वान गरेको हो ।
