ऊर्जा खबर
काठमाडौं । नेपाल कम्युनिष्ट पार्टी (माओवादी केन्द्र) ले आगामी ५ वर्षमा ५ हजार मेगावाट विद्युत उत्पादन गर्न लगानी जुटाउने प्रतिवद्धता जनाएको छ । केन्द्रले सोमबार (कात्तिक १४ गते) निर्वाचनको लागि घोषणापत्र सार्वजनिक गर्दै अहिले निर्माण प्रक्रियामा रहेका बाहेक थप उक्त क्षमताका आयोजना निर्माण गर्न लगानी जुटाउने भएको हो ।
केन्द्रले ‘नेपालको पानीमा गरौं लगानी, जलस्रोतमै छ संभावनाको खानी’ मूल नाराका साथ जलविद्युत विकासलाई समृद्धिको आधारको रुपमा प्रवर्द्धन गरी लगानी प्रोत्साहन गर्ने लक्ष्य राखेको छ । अहिले करिब ३५०० मेगावाटका आयोजना निर्माणाधीन र ५००० मेगावाटका आयोजना निर्माणमा जाने तयारीमा छन् ।
यस्तै, थप ५ हजार मेगावाटका जलविद्युत आयोजनाको पिपिए (विद्युत खरिद सम्झौता) गर्ने लक्ष्य राखिएको छ । आगामी ५ वर्षमा कुल विद्युत उत्पादन ८ हजार मेगावाट पुर्याउने केन्द्रको लक्ष्य छ ।
ऊर्जा उत्पादन क्षेत्रमा लगावनी आकर्षित गर्नका लागि लाइसेन्स प्रक्रिायालाई सहजीकरण गर्न र अनियमिततालाई अन्त्य गर्न एकद्धार अनलाइन प्रणाली स्थापित गर्न आवश्यक कानूनी व्यवस्था र प्रविधि विकासमा जोड दिने केन्द्रको घोषणापत्रमा उल्लेख छ ।
