टक्सार पिखुवाकाे ८ मेगावाट विद्युत प्रणालीमा जोडिँदै

काठमाडौं।भोजपुरस्थित ८ मेगावाटको टक्सार पिखुवा खोला जलविद्युत आयोजनाको विद्युत चैत सुरुदेखि राष्ट्रिय प्रसारण प्रणालीमा जोडिने भएको छ । टक्सार पिखुवा हाइड्रोपावर कम्पनीले निर्माण थालेको साढे २ वर्षमा सम्पन्न गरेकाे आयोजनाको विद्युत प्रणालीमा आउन लागेको हो हो ।

अहिले आयोजनामा जडान भएका उपकरणको परीक्षण भइरहेको मेकानिकल इन्जिनियर रमेशरत्न स्थापितले बताए । ‘विद्युतगृहमा जडान भएको टर्बाइन, जेनेरेटर, कन्ट्रोल प्यानल, ब्रेकरलगायत उपकरण परिक्षण भइरहेको छ,’ उनले ऊर्जा खबरसँग भने, ‘२–३ दिनभित्र संरचनामा पानी भरेर परीक्षण सुरु गर्दैछौं ।’ 

उनले संरचनामा पानी भरेर आन्तरिक परीक्षण पूरा भएपछि नेपाल विद्युत प्राधिकरणको प्राविधिक टोलीले आयोजनाको विद्युत राष्ट्रिय प्रसारण प्रणालीमा जोड्ने बताए । प्राधिकरणलाई १५ दिनसम्म निशुल्क विद्युत दिएपछि चैत दोस्रो साताबाट व्यापारीक उत्पादन सुरु गरिने पनि उनले बताए ।

आयोजनाले उत्पादन गर्ने विद्युत साढे ७ किलोमिटर दुरीमा रहेको पानीट्यांकी  सबस्टेसनमा जोडिनेछ । सबस्टेसनसम्म आवश्यक प्रसारण लाइन कम्पनी आफैले निर्माण गरेको छ ।

आयोजना सम्पन्न गर्न करिब १ अर्ब ७२ करोड रुपैयाँ  खर्च भएको छ । यो आयोजनामा सिटीजन्स र माछापुच्छ्रे बैंकले ऋण लगानी गरेका छन् । आयोजनामा ७० प्रतिशत ऋण लगानी र ३० प्रतिशत स्वपुँजी लगानी रहेको छ ।