ऊर्जा खबर
काठमाडौं । नेपाल–भारत द्विपक्षीय ऊर्जा व्यापारका विषयमा ऊर्जा, जलस्रोत तथा सिँचाइ मन्त्री पम्फा भुसाल र नेपालका लागि भारतका राजदूत नवीन श्रीवास्तवबीच छलफल भएको छ । साउन १८ गते मन्त्रालयमा भएको भेटमा ऊर्जा व्यापार एवं बाढी नियन्त्रणका विषयमा छलफल भएको हो ।
भेटका क्रममा मन्त्री भुसालले भारी वर्षासँगै सप्तकोसी नदीमा आएको बाढीका कारण एक हजार घर विस्थापित भएको बताउँदै दुवैतर्फको संयन्त्रले सक्रियतापूर्वक समस्या समाधान गर्नुपर्नेमा जोड दिइन् । ‘नेपाल–भारतबीच भइरहेको ऊर्जा व्यापारलाई थप विस्तार गर्दै लैजानका लागि आपसी सहकार्य सक्रिय बनाउनुपर्ने खाँचो छ,’ उनले भनिन्, ‘साथै, द्विदेशीय सम्झौताका आयोजनाको कार्यान्वयनलाई प्रभावकारी तुल्याउनका लागि दुवै पक्षले पहल गरेर नतिजा दिन ढिला गर्नु हुँदैन ।’
सोही अवसरमा राजदूत श्रीवास्तवले आफूले भारतका जलविद्युत् तथा सिँचाइसँग सम्बन्धित सरकारी तथा निजी क्षेत्रसँग निरन्तर छलफल गरिरहेको जानकारी गराउँदै आगामी दिनमा दुई देशबीच सहमति भएका आयोजनाको कार्यान्वयनलाई प्रभावकारी तवरले अगाडि बढाउन पहल गर्ने विश्वास दिलाए । साथै, दुई देशबीच हुँदै आएको ऊर्जा व्यापारलाई पनि थप विस्तार गरी आपसी लाभ लिने विषयमा भारत तयार रहेको बताए ।
