इन्धनबाट चल्ने सवारीलाई विद्युतीयमा रुपान्तरण गर्न थापाथली क्याम्पस र सिनबीच सम्झौता

काठमाडौं । पेट्रोलिमय पदार्थबाट चल्ने सवारी साधनहरुलाई नेपालमै उत्पादीत विद्युतबाट चल्ने विद्युतीय सवारी साधनमा परिवर्तन गर्न आवश्यक अनुसन्धान तथा प्रविधि विकासका लागि इन्जिनियरीङ अध्ययन संस्थान थापाथली क्याम्पस र सोसाइटी अफ इलेक्ट्रिकल इन्जिनियर्स (सिन) बीच सम्झौता भएको छ ।

सम्झौतापत्रमा क्याम्पसका तर्फबाट प्रमुख इन्जिनियर जनार्दन भट्ट र सीनका तर्फबाट अध्यक्ष दिल्लीरत्न शाक्यले हस्ताक्षर गरे । सम्झौता अनुसार परम्परागत ऊर्जाबाट चल्ने सवारी साधनलाई विद्युतीयमा परिवर्तन गर्ने सम्बन्धमा अध्ययन अनुसन्धान परियोजनाको पहिचान र कार्यान्वयन गर्ने, प्रविधि विकासमा अपसी सहयोग गर्ने, अनुसन्धानका नजिता तथा शैक्षिक सामाग्री आदानप्रदान गर्नुका साथै तालिम तथा परामर्श कार्यक्रम समेत गरिनेछ ।

अध्ययन अनुसन्धान र अनुभव आदानप्रदानका लागि दुबै संस्थाका ईन्जिनियरहरुबीच सहकार्य गर्ने समझदारीपत्रमा उल्लेख छ । सार्थ, नगरपालिकाभित्रका फोहोरलाई ऊर्जामा परिणत गर्ने सम्बन्धमा पनि सम्भाव्यता अध्ययन गरिनेछ ।

सीनसँगको सहकार्यले इन्जिनियरीङका विद्यार्थीहरुलाई विद्युतीय सवारीसाधनको विकासमा आफ्नो क्षमता विकास गर्न मदत पुग्ने भट्टले बताए । उनका अनुसार पेट्रोलियम पदार्थबाट चल्ने सवारीलाई विस्थापित गरी विद्युतीयमा परिणत गरी प्रभावकारी ढंगबाट चलाउन सके यसले देशकै अर्थतन्त्रमा टेवा पुर्याउनुका साथै विकास निर्माणमा पनि सहयोग पुग्नेछ ।

सीनका इन्जिनियरहरुको अनुभव, क्षमता र दक्षताका आदानप्रदानबाट थापाथली क्याम्पसबाट उत्पादन हुने भावी इन्जिनियरहरु लाभान्वित हुने शाक्यले बताए । ‘यो सहकार्यबाट आयातित पेट्रोललाई विस्थापित गर्दै आफ्नै देशको उत्पादीत विद्युतलाई आफ्नै देशमा खपत गरी विकासको आधारशिला खडा गर्न महत्वपूर्ण योगदान पुग्छ’ उनले थपे ।