ऊर्जा खबर
काठमाडौं । देशकै ठूलो ४५६ मेगावाटको माथिल्लो तामाकोसी जलविद्युत आयोजनाबाट बिहीबार (भदौ २४ गते) देखि व्यापारिक उत्पादन सुरु हुने भएको छ । परीक्षण उत्पादन सफल भएपछि आयोजनाबाट व्यापारिक उत्पादन सुरु हुन लागेको हो ।
आइतबार आयोजनाको परीक्षण उत्पादनको चरण सफलतापूर्वक सम्पन्न भएको प्रवद्र्धक अप्पर तामाकोसी हाइड्रो पावर कम्पनीका प्रमुख कार्यकारी अधिकृत विज्ञानप्रसाद श्रेष्ठले बताए । उनका अनुसार ६ वटै युनिटको परीक्षण सकिएकाले अब आयोजनाबाट व्यापारिक विद्युत उत्पादनको तयारी भइरहेको छ ।
व्यापारिक उत्पादन सुरु भएपछि कम्पनीले नेपाल विद्युत प्राधिकरणलाई विद्युत बिक्री गरी आम्दानी गर्न थाल्नेछ । पहिलो युनिट युनिटबाट असार २१ गतेदेखि परीक्षण उत्पादन सुरु गरिएको थियो । असार २९ मा दोस्रो युनिटबाट उत्पादन सुरु गरिएको थियो । भदौ १ गतेसम्ममा सबै युनिट सञ्चालनमा आइसकेका थिए ।
यो स्वदेशी लगानीमा निर्माण सम्पन्न भएको अहिलेसम्मकै ठूलो जलविद्युत आयोजना हो । आयोजनाले सबैभन्दा सुख्खा समयमा दैनिक कम्तीमा ४ घन्टा पूर्ण क्षमता (४५६ मेगावाट) उत्पादन गर्नेछ । रोल्वालिङ खोलाको पानी मिसाएर उत्पादन बढाउने योजना पनि कार्यान्वयन भइरहेको छ ।
