ऊर्जा खबर
काठमाडौं । रसुवाको उत्तरगंगा गाउँपालिकामा पहिचान भएको २४.६ मेगावाटको माथिल्लो त्रिशुली–१ क्यासकेड जलविद्युत् आयोजनाको विद्युत् खरिद सम्झौता (पिपिए) भएको छ । त्रिशुली क्यासकेड पावर प्रालि र नेपाल विद्युत् प्राधिकरणबीच बिजुली किन्ने सम्झौता भएको हो ।
प्राधिकरण र प्रवर्द्धक कम्पनीबीच आज (कात्तिक १९ गते) आयोजनाबाट उत्पादन भएको विद्युत् किन्ने सम्झौता भएको छ । सम्झौतापत्रमा प्राधिकरणका तर्फबाट उप–कार्यकारी निर्देशक प्रदिपकुमार थिके र कम्पनीको तर्फबाट कार्यकारी निर्देशक दिनेश गुरुङले हस्ताक्षर गरे ।
सम्झौताअनुसार प्राधिकरणले आयोजनाको विद्युत् प्रतिमेगावाट हिउँदमा ८.४० रुपैयाँ र बर्खामा ४.८० रुपैयाँमा खरिद गर्नेछ ।
२१६ मेगावाटको माथिल्लो त्रिशुली-१ को क्यासकेड आयोजनाको इन्टेक उत्तरगंगा गाउँपालिकामा रहनेछ भने विद्युत्गृह उत्तरगया गाउँपालिकामा रहनेगरी डिजाइन तयार पारिएको छ ।
यस आयोजनामा ७६० मिटर लामो हेडरेस पाइप निर्माण हुनेछ । ८.४५ मेगावाटको ३ वटा टवाईन जडान हुनेछ । आयोजना पूरा भएपछि उत्पादन हुने विद्युत् ८ किलोमिटर दुरीमा रहेको प्राधिकरणको थ्री बी हब सबस्टेसनमा जोडिनेछ ।
आयोजनाको काम निर्माण सुरु भएको ३ वर्षभित्र सम्पन्न गर्ने कम्पनीको लक्ष्य छ । यो आयोजना पूरा भएपछि सुख्खायाममा ३८.६९ प्रतिशत र हिउँदमा ६१.३१ प्रतिशत विद्युत् उत्पादन हुनेछ । आयोजनाको निर्माण सम्पन्न गर्न ५ अर्ब ९२ करोड ३० लाख रुपैयाँ लागत अनुमान गरिएको छ ।
.jpg)
