माया खोलाका ३३ कामदारलाई कोरोना लाग्यो, त्रिशूली-३ ‘बी’ हबमा पनि ११ जना संक्रमित

काठमाडौं । निर्माणाधीन जलविद्युत तथा प्रसारण लाइन आयोजनामा कार्यरत कर्मचारी एवं कामदारमा कोरोना (कोभिड–१९) संक्रमण बढ्दै गएको छ । निर्माणाधीन आयोजनामा बिना अवरोध काम भइरहेकाले पनि काेराेना संक्रमणकाे क्रम बढ्न थालेको हो ।

संखुवासभामा निर्माणाधीन १४.९ मेगावाटको माया खोला जलविद्युत आयोजनामा कार्यरत ३३ जना कामदारमा कोरोना संक्रमण पुष्टी भएको छ । मंगलबार गरिएको स्वाब परीक्षणपछि उनीहरूमा कोरोना संक्रमण पुष्टी भएको हो ।

ठेकेदार कम्पनीका ३६ कामदारको स्वाब परीक्षण गर्दा ३३ जनामा संक्रमण भएको मायाखोला हाइड्रो पावर कम्पनीका सञ्चालक विजयमान शेरचनले बताए । ‘सुरुमा एक जना कामदारमा कोरोनाको लक्षण देखिएकाले परीक्षण गर्दा रिपोर्ट पोजेटिभ आयो,’ उनले ऊर्जा खबरसँग भने, ‘मंगलबार फेरि संगै काम गरिरहेका बाँकी कामदारको परीक्षण गर्दा ३३ जनामा संक्रमण पुष्टी भयो ।’

संक्रमित सबैको उपचारका लागि जिल्लाको धर्मदेवी नगरपालिकामा रहेको अस्पतालमा भर्ना गरिएको शेरचनले जानकारी दिए । संक्रिमित सबैको उपचारका लागि नगरपालिकाले नै उपचारको व्यवस्थापन गरिदिएको हो ।

कामदार संक्रमित भएपछि अहिले आयोजनाको निर्माण बन्द गरिएको छ । कामदार निको नहुन्जेलका लागि आयोजनाको काम रोकिएको उनले बताए । आयोजनाको ६० प्रतिशत बढी निर्माण पूरा भइसकेको छ ।

समुन्द्रटार–त्रिशुली प्रसारण लाइन र ३‘बी’ हब सबस्टेसनमा कार्यरत ११ जना संक्रमित
निर्माणाधीन १३२ केभी समुन्द्रटार–त्रिशुली डबल सर्किट प्रसारण लाइन र त्रिशुली ३‘बी’ हब सबस्टेसनमा कार्यरत ११ जना कर्मचारी पनि कोरोना संक्रमित भएका छन् । स्वाब परीक्षणपछि उनीहरूमा कोरोना संक्रमण पुष्टी भएको हो ।

त्रिशुली ३‘बी’ सबस्टेसनका १ जना कर्मचारीलाई लक्षण देखिएपछि परीक्षण गर्दा रिपोर्ट पोजेटिभ आएको समुन्द्रटार–त्रिशुली प्रसारण लाइन आयोजना प्रमुख थर्कबहादुर थापाले बताए । ‘लक्षण देखिएको कर्मचारीको स्वाव परीक्षण गर्दा रिपोर्ट पोजेटिभ आयो,’ उनले ऊर्जाखबर सँग भने, ‘पछि बाँकी १६ जनाको गर्दा थप १० कर्मचारीमा पनि संक्रमण पुष्टी भयो ।’

संक्रमण पुष्टी भएका ६ जना त्रिशुली ३‘बी’ हबको कार्यालयमा क्वारेन्टीनमा बसेका छन् । बाँकी ५ जनालाई समुन्द्रटार–त्रिशुलको कार्यालयमा क्वारेन्टीनमा राखिएको थापाले बताए । अहिले संक्रमित कर्मचारीको अवस्था सामान्य छ । उनीहरूमा कुनै प्रकारको गम्भिर लक्ष्य देखिएको छैन ।

गत आइतबार परिक्षण गर्दा रिपोर्ट नेगेटिभ आएका बाँकी ६ जना कर्मचारीको शुक्रबार (भोलि) पुनः परीक्षण गरिने पनि थापाले बताए । देशभर कोरोनाको संक्रमण बढदै जाँदा जलविद्युत तथा प्रसारण लाइन आयोजनामा कार्यरत कामदार तथा कर्मचारी संक्रमण हुने क्रम पनि बढेको छ ।