ऊर्जा खबर
काठमाडौं । २५.४ मेगावाटको सुपर आँखुखोला जलविद्युत आयोजना निर्माणको ठेक्का प्रधान–पगोडा जेभीले पाएको छ । धादिङमा निर्माण हुने आयोजनाको सिभिल ठेक्का नेपालकै प्रधान र पगोडा कम्पनीलाई संयुक्तरूपमा दिइएको हो ।
आयोजनाको प्रवद्र्धक गोरक्ष हाइड्रो पावर कम्पनी र ठेकेदार कम्पनीबीच मंगलबार ठेक्का सम्झौता भएको छ । ठेक्का सम्झौताअनुसार ठेकेदार कम्पनीले आयोजनाको सिभिलतर्फको काम अबको ३६ महिनामा पूरा गर्ने कम्पनीका कार्यकारी निर्देशक रघुनाथ पुरीले बताए ।
‘जेठदेखि हाम्रो आयोजना निर्माणमा जाँदैछ,’ उनले ऊर्जा खबरसँग भने, ‘ठेक्का सम्झौता भइसकेकाले अब आयोजना स्थलमा परिचालन गर्छौं ।’ सिभिलपछि अब हाइड्रोमेकानिकल र इलेक्ट्रोमेकानिकलतर्फको ठेकेदार छनोट प्रक्रिया पनि चाँडै टुङ्ग्याउने उनले बताए ।
उनले आयोजनाको संरचनाको काम सुरु गर्नुअघि अहिले पहुँच सडक निर्माण भइरहेको बताए । यसअघि गत फागुनदेखि नै आयोजनाको काम सुरु गर्ने भनिए पनि पहुँच सडक निर्माण गर्न जग्गा प्राप्तिमा समय लागेकाले जेठमा पुगेको हो ।
आयोजना सम्पन्न हुँदा ४ अर्ब ५६ करोड रुपैयाँ खर्च हुने अनुमान छ । यो आयोजना निर्माण गर्न वित्तीय व्यवस्थापन भइसकेको छ । आयोजनामा प्रभु बैंकको अगुवाईमा कर्मचारी सञ्चय कोष र कृषि विकास बैंकले ३ अर्ब ४२ करोड रुपैयाँ ऋण लगानी गर्नेछन् । १ अर्ब १४ करोड रुपैयाँ स्वपुँजी लगानी हुनेछ ।
यो आयोजना २०८० सालभित्र सम्पन्न गरेर विद्युत उत्पादन गर्ने तालिका भए पनि कोरोना महामारीका कारण १ वर्ष ढिलो गरी २०८१ सालभित्र सम्पन्न गरिने भएको छ ।आयोजना सम्पन्न भएपछि बोराङ सबस्टेसनमा जोडिनेछ ।
यसअघि २२० केभी त्रिशूली–३ ‘बी’ सबस्टेसनमा जोडिने गरी नेपाल विद्युत प्राधिकरणसँग प्रसारण सम्झौता गरिएको भए पनि विद्युतगृह नजिकै बोराङ सबस्टेसन बन्न लागेकाले यहीं जोडिने कम्पनीले जनाएको छ । आयोजनाबाट वार्षिक १३९ गिगावाट घन्टा विद्युत उत्पादन हुनेछ ।
