ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्री कुलमान घिसिङले जलविद्युत् आयोजनाको विद्युत् खरिद–बिक्री सम्झौता (पिपिए) को प्रतिस्पर्धी दर तय गर्न विद्युत् नियमन आयोगलाई आग्रह गरेका छन् । आयोगका अध्यक्ष रामप्रसाद धितालले पेस गरेको आर्थिक वर्ष २०८१/८२ को आयोगको वार्षिक प्रतिवेदन बुझ्दै बुधबार उनले यस्तो आग्रह गरेका हुन् ।
मन्त्री घिसिङले जलविद्युत् आयोजनाबाट उत्पादित ऊर्जालाई थप सर्वसुलभ, प्रतिस्पर्धी र पारदर्शी बनाउन प्रतिस्पर्धी आधार दर तय गर्नुपर्ने आवश्यकता रहेको बताए । आयोगका पदाधिकारीलाई निर्देशन दिँदै घिसिङले भने, ‘सौर्य ऊर्जाको हाल प्रतिस्पर्धी आधार दर रहेको छ, जसले पिपिएलाई प्रतिस्पर्धी र पारदर्शी बनाएको छ । त्यसैगरी, जलविद्युत् आयोजनाको पिपिएको वास्तविक मूल्य तय गर्न तथा प्रक्रियालाई स्तरीय बनाएर प्रतिस्पर्धाबाट पिपिए गर्न आधार दर र बोलपत्र सम्बन्धी कागजात तयार गर्नुहोस् ।’
नेपाल विद्युत् प्राधिकरणले प्रतिस्पर्धाका आधारमा हाल सौर्य विद्युत् खरिद गर्दै आएको छ । त्यसका लागि प्रतिस्पर्धाको अधिकतम आधार दर प्रतियुनिट ५.९४ रुपैयाँ रहेको छ । जलविद्युत् आयोजनाको पिपिए दर वर्षायामका लागि ४.८० र हिउँदका लागि ८.४० रुपैयाँ रहेको छ ।
नियमनकारी निकायले गर्ने कामलाई प्रभावकारी बनाउन आयोगका पदाधिकारीलाई मन्त्री घिसिङले निर्देशन दिए । उनले निजी क्षेत्रलाई प्रवर्द्धन एवम् प्रोत्साहन र प्राधिकरणलाई दिगो बनाउने गरी आफ्ना क्रियाकलापमा केन्द्रित हुनसमेत आग्रह गरे ।
