ऊर्जा खबर
काठमाडौं । नेपाल विद्युत प्राधिकरणले नदी प्रवाही जलविद्युत (आरओआर) आयोजनाका प्रवर्द्धकलाई विद्युत खरिद सम्झौता (पिपिए) गर्न बोलाएको छ । प्राधिकरणले विद्युत जडान सम्झौता (कनेक्सन एग्रिमेन्ट) का आधारमा पिपिए गर्न बोलाएको हो ।
विद्युत प्रवर्द्धकले ग्रिड सम्झौता भएको रोलक्रमअनुसार १५ दिनभित्र पिपिए गर्न आवेदनका साथ सम्पर्क गर्नुपर्ने प्राधिकरणले जनाएको छ । प्राधिकरणले आयोजनाको अद्यावधिक विवरण सहित पिपिए गर्न बोलाएको छ ।
ग्रिड एग्रिमेन्टका आधारमा पहिलो चरणमा ६६ वटा जलविद्युत आयोजनाको पिपिए हुनेछ । गत माघ २६ गते बसेको सञ्चालक समितिको बैंठकले पिपिए खोल्ने निर्णय गरेको थियो । मन्त्रिपरिषदको असार २४ गते बसेको बैंठकले ऊर्जा समिश्रण नीति परिवर्तन गर्दै १० प्रतिशत जलाशयुक्त आयोजनाको कोटा कटाएर नदी प्रवाहमा आधारित आयोजनामा थप गर्ने निर्ण गरेको थियो ।
सोही निर्णयअनुसार प्राधिकरणले पिपिए खुलाएको हो । नदी प्रवाही आयोजनाको साविक ३५ प्रतिशत (५२५० मेगावाट) बाट १० प्रतिशत (१५०० मेगावाट) सीमा वृद्धि भएको छ । अब, ४५ प्रतिशत (६७५० मेगावाट) नपुगेसम्म पिपिए लगायत सम्पूर्ण प्रावधान यथावत रहने गरी ग्रिड कनेक्सन सम्झौताका आधारमा पिपिए गरिने प्राधिकरणले जनाएको छ ।
प्राधिकरणले अहिलेसम्म ३१९२ मेगावाट क्षमताका १३६ जलविद्युत आयोजनासँग प्रसारण सम्झौता गरेको छ । अहिले निजी ऊर्जा उत्पादकले २४० ओटा परियोजनाहरूले ११७१६ मेगावाट बराबरको पिपिएका लागि आवेदन दिएका छन् ।
