परवानीपुर सबस्टेसनमा आगलागी, वीरगन्जसहित पर्सा र बाराका अधिकांश ठाउँमा विद्युत् सेवा अवरुद्ध

काठमाडौँ । बाराको परवानीपुरमा रहेको नेपाल विद्युत् प्राधिकरणको १३२/६६/११ केभीको सबस्टेसनमा आगलागी हुँदा पर्साको वीरगन्जसहितका अधिकांश क्षेत्र र बाराका केही क्षेत्रमा विद्युत् सेवा अवरुद्ध भएको छ । बुधबार साँझ पोल ढलेर तार जुध्दा विद्युत् सर्ट भएर आगलागी भएको प्राधिकरणले जनाएको छ ।

आगलागीका कारण उक्त सबस्टेसनको ११ केभी वितरण लाइनको नियन्त्रण भवन पूरै जलेको प्राधिकरणका प्रवक्ता राजन ढकालले ऊर्जा खबरसँग बताए । ‘उक्त क्षेत्रमा प्राधिकरणले निर्माण गरेको प्रसौनी सबस्टेसन र अर्को सबस्टेसनबाट आपूर्ति दिएर त्यस क्षेत्रमा विद्युत् सुचारु गर्ने प्रयास भइरहेको छ,’ उनले भने ।

परवानीपुर सबस्टेसनबाट वीरगन्ज सबस्टेसनमा ६६ केभीको लाइनबाट विद्युत् जाने गरेको छ । त्यसपछि ११ केभी फिडर लाइनहरूबाट वीरगन्जसहित पर्साका अधिकांश क्षेत्रमा विद्युत् वितरण गरिँदै आएको थियो । हाल परवानीपुर सबस्टेसनबाट जाने ६६ केभीको लाइन नै अवरुद्ध भएको वीरगन्ज वितरण केन्द्रका इन्जिनियर वीरेन्द्र चौधरीले बताए ।

‘परवानीपुर सबस्टेसनमा रहेका ब्रेकरहरू पूरै जलेर ध्वस्त भएका छन्,’ उनले भने, ‘यहाँका धेरै उपकरण नयाँ ल्याएर नै जडान गर्नुपर्ने भएकोले तत्काल सञ्चालनमा ल्याउन सकिने अवस्था छैन तर वैकल्पिक व्यवस्था गरी आपूर्ति सुचारु गर्न सकिन्छ कि भनेर ४ वटा टोलीले अहिले स्थलगत अध्ययन गरिरहेको छ ।’