ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्री विराजभक्त श्रेष्ठले नेपाल विद्युत् प्राधिकरणसँग उपभोक्ताको माग हुने विद्युत् मिटर, ट्रान्सफर्मर लगायतका उपकरणहरूको मौज्दात र आपूर्ति व्यवस्थापनबारे जानकारी लिएका छन् । प्राधिकरणको सञ्चालक समिति बैठकका क्रममा मन्त्री श्रेष्ठले प्राधिकरण व्यवस्थापनसँग सो विषयमा छलफल गरेका हुन् । उपभोक्ताबाट मिटर तथा ट्रान्सफर्मर जस्ता आवश्यक उपकरणहरू सहज रूपमा उपलब्ध नभएको गुनासो बढेपछि मन्त्री श्रेष्ठले चासो व्यक्त गरेको मन्त्रीको सचिवालयले जनाएको छ ।
सचिवालयका अनुसार बैठकमा प्राधिकरण व्यवस्थापनले खरिद प्रक्रिया पूरा गर्दा केही समस्या देखिए पनि हाल पर्याप्त मौज्दात रहेको र थप आपूर्ति हुने क्रममा रहेको जानकारी गराएको छ । व्यवस्थापनले अब उपभोक्तालाई यस्ता उपकरणको अभाव नहुने स्पष्ट पारेको छ ।
त्यस्तै, मन्त्री श्रेष्ठले देशभर सञ्चालनमा रहेका विद्युत् प्राधिकरणका विभिन्न परियोजनाहरूको बारेमा सर्वसाधारणलाई स्पष्ट जानकारी दिने सूचनापाटी राख्न सुझाव दिएका छन् । सूचनापाटीमा परियोजनाको कुल लागत, निर्माण सम्पन्न हुने अनुमानित अवधि, निर्माण गर्ने कम्पनीको नाम, परियोजना प्रमुख तथा सूचना अधिकारीको नाम र सम्पर्क नम्बर जस्ता विवरण राख्न मन्त्री श्रेष्ठको सुझाव छ ।
मन्त्री श्रेष्ठले यस्ता सूचनापाटीले परियोजनाको पारदर्शिता बढाउने र जनताले सजिलै जानकारी पाउने बताएका छन् । यो बैठकमा ऊर्जा क्षेत्रका अन्य चालु परियोजनाहरूको प्रगति तथा चुनौतीका विषयमा पनि छलफल भएको थियो ।
