ऊर्जा खबर
काठमाडौं । ३ लाख २५ हजार १ सय ६५ जनाले ग्रीन लाइफ हाइड्रो पावर कम्पनीको सेयर हात पारेका छन् । १३ लाख २२ हजार ९ सय ७१ आवेदक मध्ये यतिले कम्पनीको सेयर प्राप्त गरेका हुन् ।
कम्पनीले शुक्रबार दोलखामा निर्माणाधीन ४० मेगावाटको खानीखोला–१ जलविद्युत आयोजनाको सेयर बाँडफाँड गरेको हो । मागभन्दा करिब ७ गुणा बढी आवेदन परेकाले गोला प्रथाबाट सेयर बाँडफाँड गरिएको कम्पनीले जनाएको छ ।
बिक्री प्रबन्धक बिओके क्यापिटलले कम्पनीको सेयर लगानीकर्तामा बाँडफाँड गरेको हो । ३ लाख २५ हजार १ सय ६५ जनालाई १० कित्ताका दरले वितरण गरेर बाँकी रहेको २ कित्ता सेयर २ जनालाई एक एक कित्ता बाँडएको छ ।
कम्पनीले गत माघ २३ गतेदेखि सर्बसाधारणका लागि सेयर निष्कासन गरेको थियो । पहिलो चरणमा आयोजना प्रभावित क्षेत्रका स्थानीयका लागि निष्कासन भई बिक्री हुन नसकेको १६ लाख ८६ हजार ४ सय कित्ता सेयरसहिन ३४ लाख ९६ हजार ४ सय कित्ता सेयर निष्कासन गरिएको थियो ।
निष्कासन भएको कूल सेयरमध्ये १ लाख ७४ हजार ८ सय २० कित्ता सामूहिक लगानी कोषलाई बाँडफाँड गरिएको छ । ६९ हजार ९ सय २८ कित्ता शेयर कम्पनीमा कार्यरत कर्मचारीमा बाँडफाँट गरिएको छ ।
साधारण सेयर निष्कासनपछि कम्पनीको चुक्ता पुँजी १ अर्ब ८० करोड पुगेको छ । कम्पनीले दोलखामा निर्माण गरिरहेको आयोजना अन्तिम चरणमा पुगेको छ । यो आयोजनाबाट चालू आर्थिक वर्षभित्र विद्युत उत्पादन सुरु गर्ने लक्ष्य छ ।
.jpg)
