ऊर्जा खबर
काठमाडौं । संस्थागत परामर्श सेवा दिने उद्देश्यले मिड सोलु हाइड्रो पावर कम्पनी लिमिटेड र एनआईसी एसिया क्यापिटलबीच बिहीबार (जेठ ५ गते) सम्झौता भएको छ । क्यापीटलको ‘आइडिया टु आइपिओ’ सेवा अन्तर्गत उक्त सम्झौता भएको हो ।
सम्झौता अनुसार क्यापिटलले कम्पनीलाई स्थापनाकालदेखि नै आइपिओ (सेयर) जारी गर्ने चरणसम्म पुर्याउन आवश्यक सम्पूर्ण सेवा उपलब्ध गराउनेछ । हाइड्रो पावर कम्पनीले ९.५ मेगावाटको मध्य सोलु जलविद्युत आयोजनाको सेयर निष्कासन गरी बाँडफाँड गर्न क्यापिटललाई बिक्री प्रबन्धक तोकेको हो ।
सोलुले निकट भविष्यमा आयोजना प्रभावित स्थानीय र सर्वसाधरण (सामूहिक लगानी कोष तथा कर्मचारी सहित) लाई सेयर निष्कासन गर्नेछ ।
क्यापिटलको योजना अन्तर्गत कुनै पनि कम्पनीले तत्काल आइपिओ जारी गर्न नसक्ने अवस्था देखिएमा त्यस्ता कम्पनीहरुको सेयर जारी गर्दा पूरा गर्नुपर्ने सम्पूर्ण कानूनी प्रक्रिया तथा कागजातका सम्बन्धमा आवश्यक परामर्श तथा मार्गनिर्देशन गरी यथाशिघ्र सेयर जारी गर्ने योग्य बनाउन महत्वपूर्ण योगदान प्रदान गर्छ ।
