जलविद्युत कम्पनीमा सचेत भई लगानी गर्नु-आयोग

काठमाडाैं । विद्युत क्षेत्रकाे नियामक विद्युत नियमन आयोगले पुँजी बजारमा वित्तीय स्वास्थ्य कमजोर भएका जलविद्युत कम्पनीको सेयर मूल्य अस्वभाविरूपमा बढिरहेकाले सचेत भई लगानी गर्न आग्रह गरेको छ । आयोगले बिहीबार सूचना जारी गरी जलविद्युत कम्पनीको सम्पूर्ण अवस्थाको अध्ययन गरेर मात्रै लगानी गर्न लगानीकर्तालाई सचेत गराएको हो ।

लामो समयदेखि केही जलविद्युत कम्पनीका प्रवर्द्धक नै गलत वित्तीय विवरण दिई दोस्रो बजारमा सेयर मूल्य  अस्वभाविकरूपमा बढाउने कार्यमा लागेको भन्ने खबरहरू सार्वजनिक भइरहेको भन्दै आयोगको ध्यानाकर्षण भएको सूचनामा भनिएको छ । 

लगानीकर्ताले जलविद्युत कम्पनीको वित्तीय अवस्थाका बारेमा बुझेर मात्रै लगानी गर्नुपर्ने तथा नेपाल स्टक एक्सचेन्जमा सूचीकृत जलविद्युत कम्पनीले पनि सत्य तथ्य र वास्तविक वित्तीय विवरण सार्वजनिक गर्नुपर्ने दायित्व भएको आयोगले भनेको छ ।

‘लगानी गर्नुअघि जलविद्युत कम्पनीको नेटवर्थ, बजार मूल्य र प्रतिसेयर आम्दानीको अनुपातको जानकारी लगानीकर्ताले लिनुपर्छ,’ सूचनामा भनिएको छ, ‘यस बाहेक पनि चालू सम्पत्ति र दायित्वको अनुपात, तरलता अनुपात, निर्माणाधीन आयोजनाकाे प्रवर्द्धक कम्पनीको हकमा प्रगति विवरणबारे पनि बुझ्नु पर्छ ।’

निर्माणाधीन आयोजनाको विद्युत प्रवाह हुने प्रसारण लाइन तयार भए÷नभएको, बैंक तथा वित्तीय संस्थाको ऋण तिरिरहेको वा नतिरेको, संचित मुनाफा भए/नभएको, लाभांशको इतिहास, विद्युतगृह पूर्ण क्षमतामा चले÷नचलेको, ऋणको ब्याजको अवस्थालगायतमा पनि लगानीकर्ताले ध्यान पुर्याउने पर्ने सुझाव आयोगले दिएको छ ।

जलविद्युत कम्पनीमा लगानी गर्दा सम्भावित मुनाफा तथा आउन सक्ने जोखिमको पनि लगानीकर्ताले आँकलन गर्नुपर्ने आयोगको भनाई छ । नियतपूर्वक लगानीकर्ता झुक्याउने तथ बहकाउने उद्देश्यले गलत सूचना प्रवाह गर्ने जलविद्यूत कम्पनी तथा प्रवर्द्धक विरुद्ध कडा कारबाही गर्ने चेतावनी पनि आयोगले दिएको छ । साथै, आयोगले जलविद्युत कम्पनीको प्राविधिक तथा वित्तीय अवस्था, दिनसक्ने प्रतिफलका सम्बन्धमा राम्रोसँग अध्ययन गरी तथ्यपरक सूचनाका आधारमा मात्रै सेयर खरिद गर्न अनुरोध गरेको छ ।