४४ मेगावाटको भोटेकोसी–१ को मुख्य सुरुङ छिचोलियो

काठमाडौँ । सिन्धुपाल्चोकको भोटेकोसी गाउँपालिकामा निर्माणाधीन ४४ मेगावाटको भोटेकोसी–१ जलविद्युत् आयोजनाको मुख्य सुरुङ छिचोलिएको (ब्रेक थ्रु भएको) छ । आयोजनाको २६३८.५३ मिटर लामो सुरुङ सोमबार छिचोलिएको हो । यसै अवसरमा सोमबार आयोजनास्थलमा एक कार्यक्रम गरी प्रवर्द्धक इलेक्ट्रो पावर कम्पनी लिमिटेडले विशेष उल्लास मनाएको छ । 

सुरुङ छिचोलिएसँगै आयोजनाको ८० प्रतिशत काम सम्पन्न भएको र बाँकी काम सकेर आउँदो चैतसम्म सकेर यसै वर्ष सञ्चालनमा ल्याउने तयारी रहेको प्रवर्द्धक कम्पनीका अध्यक्ष मोहनविक्रम कार्कीले ऊर्जा खबरसँग बताए । 

उनका अनुसार आयोजनाको बाँध भोटेकोसी–३ मा र विद्युत्‌गृह भोटेकोसी–४ मा निर्माण भइरहेका छन् । इलेक्ट्रो पावर कम्पनीले निर्माण गरिरहेको आयोजनाको लागत अनुमान करिब १० अर्ब रुपैयाँ रहेको छ । पहिला ४० मेगावाट क्षमतामा निर्माण गर्न लागिएको आयोजनाको डिजाइन परिवर्तन गरी ४ मेगावाट थप भएपछि ४४ मेगावाट जडित क्षमतामा आयोजना निर्माण हुन लागेको हो । 

इलेक्ट्रो हाइड्रोले २०८० साल साउनबाट आयोजना निर्माण सुरु गरेको थियो ।